Кәсіби шеберлік сайысы өтті
Ақтөбе облысы бойынша меншікті тілші
Ақтөбедегі теміржол колледжінде республикалық кәсіби шеберлік сайысы өтті. Оған еліміздегі теміржол саласына мамандар дайындайтын оқу орындарының ұстаздары қатысты.
Ақтөбе көлік, байланыс және жаңа технологиялар колледжіне өткен шара екі күнге жалғасты. Өзара әріптестік байланыс орнатып, техникалық және кәсіптік білім беру шеберлігімен бөліскен ұстаздар тәжірибелік сабақтар да өткізді.
Шараға Ақмола, Қарағанды, Алматы, Павлодар, Қостанай, Ақтөбе, Шымкент, Түркістан, Маңғыстау, Атырау, Жезқазған, Тараз облыстарынан 31 арнайы пән оқытушылары мен өндірістік оқыту шеберлері келді. Олар автоматика, телемеханика және теміржол көлігіндегі қозғалысты басқару, теміржол көлігінің көтергіш-көлік, құрылыс-жол машиналары мен механизмдерін техникалық пайдалану, темір жолдың тартқыш жылжымалы құрамын пайдалану, жөндеу және техникалық қызмет көрсету, темір жолдың вагондар мен рефрижераторлы жылжымалы құрамын пайдалану, жөндеу және техникалық қызмет көрсету, теміржол құрылысы, жол және жол шаруашылығы, теміржол көлігінде тасымалдауды ұйымдастыру және қозғалысты басқару мамандықтары бойынша практикалық дайындықтарын көрсетті.
«Өтіп жатқан шара теміржолшы мамандығының дәрежесін көтеріп, мерейін арттыруға ықпал етеді. Шеберлік байқау тәжірибелік негізде өтті. 1300 студент білім алатын біздің колледжді жылына 300 түлек бітіреді. Бәріне мемлекеттік грант бөлінген. Сондықтан жұмыспен қамту жоғары деңгейде», – деді колледж директорының орынбасары Марат Рамазанов.
Байқау нәтижесі бойынша жеңімпаздар марапатталып, ұстаздар қауымы мұндай шараның білім беру деңгейін арттыратынын жеткізді.