«Syrmaq Fest»: Маңғыстаулық теміржолшы қолөнер көрмесін ұйымдастырды

Ұлттық құндылықтарды ұлықтап, көнеден жеткен қолөнеріміздің насихатталуына өзіндік үлесін қосып жүрген маңғыстаулық теміржолшы Күнсұлу Бектұрғанның ұйымдастыруымен жақында Маңғыстауда «Syrmaq Fest» атты республикалық көрме-фестиваль өтті.

Жетібай станциясында жүк және багаж қабылдап-тапсырушы болып еңбек ететін Күнсұлу Бектұрған өңірге белгілі қолөнерші, «Ұршық» республикалық қоғамдық бірлестігінің Маңғыстау облыстық филиалының директоры. Биыл елордада өткен халықаралық «Көшпенділер ойындары» аясында ұйымдастырылған «Аламан құрақ» жобасына қатысып, Гиннестің және Қазақстанның құрақшылар рекордын жаңартқан ісмерлердің бірі. Негізгі қызметінен тыс уақытта өзінің «Асыл мұра» орталығында еліміздің түкпір-түкпіріндегі қыз-келіншектерге онлайн және оффлайн түрде сабақ беріп, қолөнерге баулып келеді.  

Облыс орталығындағы «Достық» үйінде өткен «Сырмақ фест» фестиваліне еліміздің түрлі өңірінен 150-ге жуық қолөнер шебері қатысты. Олар көрмеге алып келген жұмыстарын таныстырып, бір-бірімен тәжірибе алмасты. Тегін шеберлік сыныптарын өткізіп, өз өнерлерінің қыр-сыры туралы сұрақтарға жауап берді. Қыз-келіншектердің барлығы бір уақытта ұршық иіріп, «ұршық патидің» сәнін келтірді. Сырмақ, түскиіз, алатеру, текемет, басқұр, бау сынды қолдан дайындаған бұйымдарын сарапшылар назарына ұсынды. Өнерімен тәнті еткен шеберлер Астана қаласында этнограф, тарихшы, басқа да өнер саласын зерттеуші ғалымдар алдында қорғауға жолдама сертификат алды.  

Үш күнге созылған көрме-фестивальге қатысушылар да, оны тамашалауға келгендер де өте көп болды. Қолөнершілер дайындаған бұйымдарын қоятын орын жетпей жатты. Жергілікті шеберлер алыстан келген қонақтарға орын беріп, өздері тәжірибе алмасып, ұршық патиге қатысумен ғана шектелді. Сондай-ақ шараға мектептерде көркемөнер, еңбек пәні бойынша сабақ беретін мұғалімдер де арнайы шақырылды. Қолөнерге әуестенген жас шеберлер де сол жерден табылды.  

– «Ана көрген тон пішер» дейді дана халқымыз, кезінде біз аналарымыз бен әжелерімізден үйренген ұлттық қолөнеріміз ұмыт қалмаса дейміз. Көбін бүгінгі ұрпақ біле бермейді, оны білетін аналарымыз да қалмай бара жатыр. Сондықтан жойылып бара жатқан сондай құнды дүниелерімізді жарыққа шығару, өскелең ұрпаққа көрсету мақсатында бүгінгі шараны өткізіп отырмыз. Астанадағы Қолөнер «Ұршық» республикалық қоғамдық бірлестігінің төрайымы Бибігүл Кәрденованың жобасы септік етіп, бүгін мақсатымыздың бір бөлігі орындалғандай. Астанадағы ұйымымыз облыстарда осындай фестивальдар өткізейін деп жатыр дегенді естіп, алдымен Маңғыстауда ұйымдастырайық деп бастама көтеріп, шеберлердің басын қосып отырмыз, – дейді Күнсұлу ханым.