Станция басшылары біліктілігін арттырды

Қозғалыс қауіпсіздігін сақтауда станция басшыларының біліктілігі – бірінші кезектегі маңызды мәселе. Бұл орайда Семей ЖТ бөлімшесінде берері мол қызметтік дәстүр қалыптасқан. Атап айтсақ, жылдың әр мезгілінде станция басшыларының кәсіби шеберлігін шыңдап, білім-білігін арттыру мақсатында түрлі іс-шаралар өткізіледі.  

Осыған дейінгі шаралар қатарында танымдық ойын түріндегі түрлі сайыстар болса, биылғы жылы практикалық көрсетілімдер қамтылған техникалық сабақтар өткізілді. Айта кетерлігі, аталған шараны бөлімше басшысы Алмас Сейсемқанов пен орынбасарлары өздері өткізіп, бастан-аяқ жүргізіп шықты.

Бөлімшедегі барлық станциялар бойынша ұйымдастырылған дәрістер негізінен қозғалыс қауіпсіздігіне нұқсан келтірер жайттардың алдын алуға бағытталған. Желі бойында өткен іс-шараларға кластан тыс және 1-ші, 5-ші класты станциялар басшылары толық құраммен қатысты.  

Техникалық сабақтар барысында қозғалыс қауіпсіздігіне бірінші кезекте нұқсан келтірер мәселелер талқыланды. Атап айтсақ, маневрлік жұмыстар барысындағы қауіпсіздік, сұрыптау дөңесіндегі қозғалыс жиілігін реттеу, жылдамдық режимін сақтау және нормативтік-техникалық құжаттарды рәсімдеу, жылжымалы құрамдар мен құрылғыларға күтім көрсету жайлы кеңінен сөз болды. Бұл ретте тәжірибелі станция басшыларының пікірлері де тыңдалды. Мәселен, Шаған станциясының бастығы Айдос Тоқтаров, Жаңғызтөбе станциясы басшысы Азамат Нұрғалиев қызмет барысындағы тәжірибелерімен бөлісті. Мұнымен қатар кейбір техникалық құрылғылардың жұмысы және істен шығуы бойынша талдаулар да жасалды.

Сонымен қатар №971-ЦЗ бұйрығына сәйкес Аягөз станциясы бойынша ай сайынғы оқу-көрсеткіштік комиссиялық тексерулер де жүргізілді. Аталмыш іс-шараларға қозғалыс шаруашылығының барлық мамандары, телімдік ревизорлар да қатысып, қызмет барысында жиі кездесетін күрделі мәселелер қатарын талқылады. Іс-шара барысында бағыттамалы бұрмалар күтімінен бастап, қабылдап-жөнелту жолдарындағы қауіпсіздік талаптары да қарастырылды.

Мұндай шараларды өткізудің маңыздылығы зор болып тұр. Біріншіден, алдағы қатал қысқа жоғары деңгейдегі даярлықпен кіру, екіншіден өткен 10 ай бойынша бөлімше көлемінде орын алған, ревизорлық нұсқау кітабына енгізілген 213 ескерту бойынша нәтиже шығару қажет.  

Айта кетсек, осыған дейін жүргізілген тексерулер барысында 14 станция басшысына, 5 локомотив шаруашылығы басшыларына, вагон шаруашылығының 4 басшысына арнайы жаза қолданылған еді. Жыл соңында бөлімше бойынша технологиялық процестерді орындау мен техникалық сабақтардың ұйымдастырылуы мен өткізілуіне де тиісті деңгейде көңіл бөлінетін болады.