Күзет мамандары үш тілді қатар меңгеруде
Түркістан облысы бойынша меншікті тілші
Мәдениетаралық коммуникациялық дағдыларды дамыту мақсатында «Әскерилендірген теміржол күзеті» ЖШС Түркістан филиалы аппаратының мамандары жыл басынан бері кезең-кезең бойынша үш тілді жетік меңгеруге бағытталған арнайы курстарда білім жетілдіруде.
Биылғы ақпан айынан бастау алған курс 4 айлық кезең бойынша жүргізілді. Алдымен ағылшын тілі, содан соң қазақ тілін оқыту тәмамдалған болса, осы күндері орыс тілін үйрету үдерісі жыл соңына дейін жалғасады деп жоспарланған. Ал сабақтарды Шымкент қаласының тілдер бойынша оқу-әдістемелік орталығының маманы өткізуде.
ӘТЖК Түркістан филилалы аппаратының өкілдері мұндай шара ҚТЖ басшылығының бастамасы негізінде жүзеге асып жатқан жоба екенін айтады. Яғни әрбір еншілес компания өздеріндегі кіріс-шығыс құжаттарын толық қазақ тілінде жүргізілуін қамтамасыз ету үшін тіл үйрету орталықтарына жүгінуі тиіс болған. Қажеттілік туындаған жағдайда орыс және ағылшын тілін де еркін қолдану мүмкіндігі қарастырылғаны белгілі.
– Біз Шымкент қаласының тілдерді дамыту орталығына хатпен шығып, олар тіл мамандарын біздің мекемеге арнайы жолдады. Бірнеше айға жоспарланған жоба аясында ондаған әріптесіміз үш тілді қатар меңгеріп келеді, – дейді ӘТЖК Түркістан филиалының кадр жөніндегі бөлім жетекшісі Салтанат Әмзеқызы.
Нәтижесінде мекемеде еңбек ететін әкімшілік-персонал санатындағы 10 қызметкер 4 ай бойы қазақ тілінде білім жетілдіріп, арнайы сертификат алған. Жүз пайыз қазақтілді өңірде қазақ тілін оқыту – тіл үйрену емес, құжаттық деңгейде іс жүргізуге бағытталған.
Ал сәуір айынан бастап осы құрамға ағылшын тілін тегін оқыту курсы жүргізілген. Бұл кезеңде бірінші деңгей бойынша белгіленген мерзімде білім алып, тест тапсырған теміржолшы-күзетшілер де тиісті сертификаттарға иелік еткен. Қараша айы басталғалы ұжымда орыс тілін оқыту жүргізіліп жатыр.
Айта кетейік, бүгінде филиал жетекшісінің тапсырмасына орай мекемедегі ішкі айналым құжаттары 100 пайыз қазақ тілінде жүргізіледі. Мыңға жуық жұмысшыдан тұратын ұжымның 98 пайызын қазақ ұлтының өкілдері құрайы.