Пойыз құрастырушы құрметті демалысына шықты
Абай облысы бойынша меншікті тілші
Жуырда Суықбұлақ станциясының пойыз құрастырушысы Ерболат Тілеубердиновті әріптестері салтанатты түрде зейнет демалысына шығарып салды.
Айта кетсек, Ерболат Төлеуғазыұлы құладүздегі осынау шағын станцияда бір адамның ғұмыры дерлік 46 жыл бойы табан аудармастан еңбек етіпті. Қиын да қауіпті кәсіпті атқара жүріп, қаншама жас мамандарды тәрбиелеп шығарды. Осыған дейін ескерту, сөгіс алып көрмеген, жұмысын бес саусақтай меңгерген кәсіби маманмен әріптестері қимай қоштасты. Бөлімше бастығының бірінші орынбасары Ғабит Есқожанов кәсіподақ ұйымы және кадр бөлімі басшылығымен бірге бөлімше төрінде арнайы құттықтап, ардагерге құрмет көрсетті. Кәсіподақ ұйымының ұйытқы болуымен ақшалай сыйлық беріліп, «Қазақстан темір жолына 120 жыл» естелік төсбелгісі табыс етілді.
– Жарты ғасырға жуық ерен еңбегіңіз үшін сізге бөлімше басшылығының атынан зор алғысымызды жеткіземіз. Ендігі аралықта еңбегіңіздің жемісін, зейнетін көріңіз, – деді өз сөзінде Ғабит Ғазизұлы.
Әріптестеріне алғыс айтқан Ерболат Төлеуғазыұлы ұжымын қимайтынын, алдағы уақытта ардагерлер ұйымының қатарында Семей теміржолымен рухани байланысын үзбейтінін жеткізді.
