Тараз торабындағы келелі кеңес

Дүйсенбі күні ҚТЖ басшылығының өңірлерге сапары Жамбыл облысында жалғасты. Алдымен Тараз қаласына ат басын бұрған компания жетекшілері жергілікті теміржол кәсіпорындарын аралап, аймақ ахуалымен танысты.

Жамбыл локомотив пайдалану депосына келген қонақтар байырғы депоның өндірістік нысандарын тексеріп, локомотив шаруашылығының қысқы жағдайда жұмыс істеуге дайындығы пысықталды. Бүгінгі таңда депода машинистер және машинист көмекшілері бар барлығы 750 адам еңбек етеді.  

ҚТЖ басшылығы Тараз локомотив жөндеу депосының цехтарын да аралап көріп, тартымды жылжымалы құрамға техникалық қызмет көрсету, доңғалақ жұптарын жөндеу мәселелері талқыланды. Ал Жамбыл белгі беру және байланыс дистанциясында компания басшылары ұжыммен кездесіп, қызметкерлерінің еңбек жағдайын көзбен көрді, кәсіпорынның алдағы жылғы жұмыс жоспарымен танысты. Жамбыл телімінде пойыздар қозғалысының қауіпсіздігін қамтамасыз етуде дистанция жұмысының маңыздылығы атап өтілді.  

Түске қарай Тараз торабындағы барлық желілік кәсіпорындардың жетекшілері қатысқан кеңес өтіп, Жамбыл жүк тасымалы және магистральдық желі бөлімшелерінің, тағы басқа жауапты желілік басшылар жергілікті ахуалды баяндап, сала жұмысынан толыққанды ақпар берді.  

Компания басшылығы сондай-ақ өңірдегі ірі жүк жөнелтушілермен де кездесіп, түйінді мәселелер төңірегінде пікір алмасты. Шу станциясы мен дөңестік жүйелерді дамыту мәселесі сөз болып, аймақтағы кластан тыс ірі станциясының өзекті мәселелері талқыланды. Шу сұрыптау станциясы Шу – Арыс, Шу – Алматы, Шу – Мойынты үш бағытында жұмыс істейді. 2024 жылы станция бойынша жүк пойыздарын қабылдау тәулігіне 78-88 жұп пойызды құрап, 2023 жылмен салыстырғанда 7-8 жұпқа көбейген. Жыл басынан бері транзиттік ағын да артқан. Технологиялық процестерді жақсарту және Шу станциясында пойыздарды өңдеу уақытын жеделдету үшін Шу станциясының транзиттік паркінде бұрын бөлшектелген қабылдау-жөнелту жолдарын, дөңесалды паркіндегі жүріс жолын қалпына келтіру қарастырылуда. Сондай-ақ сұрыптау паркінің жолдарын байланыс желісімен және т.б. жабдықтау ұсынылды.  

Станцияда осы іс-шараларды іске асыру пойыздарды өңдеу уақытын 10%-ға дейін қысқартуға, локомотив паркін тиімді пайдалануға және оның өнімділігін арттыруға, вагон ағындарын реттеуге және жүктерді жеткізу мерзімін қысқартуға әсер етеді.  

Ал барлық желілік кәсіпорындардың еңбек ұжымдарымен өткен дәстүрлі кездесуде компания басшылығы Тараз торабы жұмысшыларына өңірдегі теміржол көлігін дамытуға қосқан сүбелі үлестері үшін алғыс айтты. Әрбір қызметкердің жұмысының маңыздылығы атап өтілді. Бірқатар үздік теміржолшылар Қазақстан темір жолының 120 жылдығына орай марапатқа ие болды.