ҚТЖ басшылығы Алматы теміржол торабындағы кәсіпорындарды аралады
Компания басшылығының аймақтарға жұмыс сапары Алматы теміржол торабы кәсіпорындарын аралаумен жалғасты, деп хабарлайды Rail-news.kz.
ҚТЖ басшылығы магистральдық желі дирекциясының ірі материалдық-техникалық базаларының бірінің өндірістік алаңдары, қоймалары, кіреберіс жолдарын тексерді.
Сондай-ақ жұмыс сапары кезінде ҚТЖ басшылығы Алматы-2 логистикалық кешенінің құрылыс барысымен танысты.
Бүгінгі таңда инженерлік-геодезиялық және геологиялық іздестіру жұмыстары жүргізіліп, демонтаж бойынша жұмыстар басталды.
Ауданы шамамен 10 гектар болатын терминал аумағында заманауи жабық (24 500 м²) және ашық (12 000 м²) қоймалардың, сонымен қатар контейнерлік алаңдардың (12 000м²) құрылысы қарастырылған. Жобалық қуаты 57 мың ЖФЭ кешен құрылысын 2025 жылы аяқтау жоспарланған. Жобаны жүзеге асыру Алматы қаласы мен Алматы облысының жүк жөнелтушілері үшін импорттық хаб режимінде ҚХР-дың іс жүзінде барлық өңірлерінен жүктерді жоғары деңгейде үйлестіруге мүмкіндік береді.
Компания басшылығы Оңтүстік-Шығыс аймағы бойынша пойыздар қозғалысын басқарудың Өңірлік орталығына барды. (Алматы ПБӨО-2). ПБӨО-2 Алматы, Шымкент, Жамбыл және Семей бөлімшелерінің диспетчерлік орталықтарын біріктіреді, жолдың эксплуатациялық ұзындығы 4450 км.
Кездесу барысында пойыздардың үздіксіз және қауіпсіз қозғалысын қамтамасыз етуде ПБӨО-2 мекемесінің әрбір қызметкеріне жоғары жауапкершілік жүктелетіні атап өтілді.
Алматы магистральдық желі және жүк тасымалы бөлімшелері басшыларымен өткен жиналыста қауіпсіздік деңгейін арттыруға ерекше басымдық берілді. Сонымен қатар, өндірістік қызмет, еңбек жағдайы, әлеуметтік жауапкершілік мәселелері талқыланды.
Кейін компания басшылығының өңірге жұмыс сапары барысында Алматы торабы теміржол кәсіпорындары ұжымдарының қатысуымен салтанатты іс-шара өтті. Басшылық теміржолшыларды Қазақстан темір жолының 120 жылдығымен құттықтап, теміржолшы мамандығының маңызы мен әрбір қызметкердің саланы дамытудағы үлесін атап өтті. Кездесу кезінде ерен еңбегімен көзге түскен жұмыскерлер мен сала ардагерлеріне марапаттар табысталды.
