Тәлімді тренинг Қызылордада жалғасты
Қызылорда облысы бойынша меншікті тілші
«Білім экспресі» Қызылордаға да жетті. Сексеуіл станциясында өткен екі күндік трениг «Тиімді коммуникация, Стресске қарсы тұру, Жанжалды басқару, Эмоционалды интеллект» тақырыбына арналды.
Ұлттық компанияның кадр мамандары өткізген тренингке бөлімшенің барлық құрылымдарынан 60-қа жуық қызметкерлер қатысты. Алғашқы күні Сексеуіл жол дистанциясында, екінші күні Сексеуіл локомотив пайдалану депосында ҚТЖ-ның ішкі тренерлері Алма Сәулебаева – коммуникациялық тиімділік, Бекзат Кәрімхановпен бірлесіп – Стресске, психологиялық күйзеліске төзімділік, Катаева Гүлнар – конфликтіні басқару тақырыптарында лекция-сабақ өткізіп, теміржолшылардың қызу талқылауына түскен сауалдарды саралап, осындай ситуациялардың шырмалған шеңберіне тап болған жағдайларда оның әсерінен шығу жолдарын түсіндірді.
– Қатысушылардың тыңдауға, үйренуге деген құлшынысы өте жоғары болды. Біздің арнайы дайындап алып барған жұмыс жоспарымызды тез ұғынып, меңгере білуі, түсіне отырып әрбір жаттығуға белсене қатысып, жауап беруі қатысушылардың жоғары деңгейін көрсетті. Теміржолшылар тарапынан осындай тренингтерді жыл сайын кемінде үш күндік мерзіммен өткізсе деген ұсыныс-пікірлер болды, – дейді Бекзат Кәрімханов.
Тренингті ұйымдастырушыларға алғыс білдіргендер қатарында Сексеуіл жол дистанциясының жол инженері Қуаныш Ақтілек тәлімі мол тағлымды шарадан көп нәрсе үйренгенін жеткізді.