Теміржолдың қорғаны мен қалқаны
Ақтөбе облысы бойынша меншікті тілші
Стратегиялық объектілер мен теміржол көлігімен тасымалданатын жүктердің сақталуын ғасырдан аса уақыт қамтамасыз етіп келе жатқан құрылым кезекті туған күнін атап өтті.
«Әскерилендірілген теміржол күзеті» ЖШС Ақтөбе филиалында өткен шарада сөз сөйлеген мекеме директоры Сарыбай Сәрсенов күзет қызметі теміржолдың қорғаны мен қалқаны деді.
«Өзінің бір ғасырлық тарихында теміржол күзеті алуан түрлі қиын кезеңдерді бастан өткізді. Сонау патшалық Ресейдің кезінде құрылған бұл қызмет сол кездің өзінде өз міндетін адал атқарып, жол бойындағы ұрлық-қарлық, алыпсатарлық пен бандитизмге, жүктерді рұқсатсыз тасымалдауға және пойыздарда билетсіз жол жүруге қарсы күрес жүргізді. Ұлы Отан соғысы, Кеңес одағының ыдырауы секілді елеулі тарихи оқиғалардың салдарынан бұл сала сан рет құрылымдық өзгерістерге ұшырады. Егемендік алған 90-шы жылдардан бастап Әскерилендірілген теміржол күзеті тәуелсіз Қазақстанның темір жолының құрамында жұмысын жалғастырды. Тәуелсіздіктің алғашқы жылдарындағы экономикалық дағдарыстар, нарықтық жүйеге ауысу да күзет қызметінің жаңаша сипатқа ие болуына әсерін тигізді», – деді өз сөзінде Сарыбай Жанғалиұлы.
2001 жылғы 22 қыркүйекте үкіметтің шешімімен «Әскерилендірілген теміржол күзеті» ашық акционерлік қоғамы болып қайта құрылды. Қазіргі заман талаптарына сай болып жатқан құрылымдық өзгерістерге байланысты 2020 жылдан бастап «Әскерилендірілген темір жол күзеті» жауапкершілігі шектеулі серіктестігі болып саналады. Бүгінгі таңда «ӘТЖК» ЖШС – магистраль объектілерінің қауіпсіздігін, тасымалданатын жүктердің ілеспе күзетін және сақталуын қамтамасыз ететін Қазақстанның көпфункционалды ірі күзет ұйымдарының бірі. Серіктестіктің Республикамыздың барлық аумағын қамтитын 11 филиалы бар. Солардың бірі – Ақтөбе филиалының қызмет көрсету телімінің жалпы ұзындығы – 2040 шақырым. Оның ішінде 165 шақырым темір жол Ресей федерациясы арқылы өтеді. Филиалға қарасты 8 атқыштар командасы, 3 атқыштар тобы мен жедел әрекет етуші оңтайландырылған тобымен қамтылған. 1 атқыштар командасы теміржол көпірінің күзетін қамтамасыз етеді. Барлық атқыштар командалары заманауи компьютерлік техникамен, жеке құрам нысанды киім-кешекпен, мобильді байланыспен жабдықталған.
Салтанатты жиында өз міндетіне адал күзет қызметінің сарбаздары марапатқа ие болып, кәсіподақ ұйымы тарапынан сыйлыққа кенелді.