Тәуелсіздік пен тіл – егіз ұғым
Абай облысы бойынша меншікті тілші
Семей магистральдық желі бөлімшесінде «Тәуелсіз Қазақстан: бәсекеге қабілеттілік және тұрақтылық» атты тақырыпта мән-мағынасы ерекше семинар болып өтті.
Егемендік, тіл, дәстүр сынды құндылықтарды өзек еткен жиынды өткізуге бөлімшенің техникалық кітапханасы ұйытқы болған еді. Семинарға бөлімше басшылығы, сала ардагерлері, мекемелер мен бөлімдер инженерлері, әкімдік қызметкерлері, жергілікті БАҚ өкілдері қатысты.
Басқосуды Семей вокзалының 1-ші дәрежелі инженері Меруерт Әуелгазина өз мәнінде жүргізіп, жиналғандарға кезекпен сөз беріп отырды.
Жиын беташарында сөз алған НЖС-6 басшысының бірінші орынбасары Азат Беркімбаев ел тәуелсіздігінің басты тірегі саналар мемлекеттік тіл мәселесі жайында кеңінен сөз етті. Бұл ретте ұлттық компания тарапынан қолға алынып жатқан идеологиялық маңызы зор қоғамдық шаралар мен тың бастамаларға да кеңінен тоқталып өткен ол әріптестерін Тәуелсіздік күні мерекесімен құттықтады.
Жиын барысында зейнеткер Қамария Тангишева да пікір қосып, бүгінде құжаттандыру ісінің де қазақ тілінде жүргізіле бастағанына қолдау білдірді. Мысалы, биыл теміржолшылар арасында тұңғыш рет өткен «Ана тілім – ардағым» атты республикалық байқауында НЖС-6 бөлімшесінің «Абай елі» командасы жүлделі екінші орынды жеңіп алды. Сол тәрізді мемлекеттік тілден тест тапсыру ең бірінші Семей қаласында өтіп, 50 теміржолшы қатысып, ана тілін жүз пайыз меңгергендіктерін дәлелдеген болатын. Әйтсе де, тіл жанашыры Қамария Жұманқызы ана тілімізге құрмет әлі де болса қажет екендігін жеткізді.
Семинарды ұйымдастырушылардың бірі, НЖС-6 персоналды басқару бөлімінің жетекші аудармашысы Бекжан Рымбаев та тақырып аясында сөз өрбітті.
– Теміржолшылар арасында Тәуелсіздігіміздің бірден бір символы саналар мемлекеттік тілдің қолданыс аясын кеңейту, мемлекеттік тілді меңгерген сала қызметкерлерін ынталандыру, ұлттық құндылықтарды дәріптеу – бүгінгі күннің басты талабы. Расында кез келген халықтың ұлттық ерекшелігін танытатын қасиетті құрал – тіл, – дейді бұл орайда аталмыш шараны ұйымдастырушы, НЖС-6 бөлімшесі ғылыми-техникалық ақпарат және талдау орталығы бастығы Баршагүл Омарова.
Жиын қорытындысында қатысушылар осындай маңызды тақырыптарды арқау еткен жиындарды алдағы уақыттарда да жиі өткізіп, оған жастар қауымын көптеп тарту қажеттігін атап өтті.
