Атырау вокзалы абаттандырылып жатыр
Атырау облысы бойынша меншікті тілші
Жарты ғасырдан астам уақыт халыққа қызмет етіп келе жатқан Атырау теміржол вокзалында жөндеу жұмыстары жүріп жатыр.
Қала әкімдігінің вокзал алдын абаттандыру бойынша бұл жобасы жолаушыларға қолайлы жағдай жасап, сервистік қызметті арттыруды көздейді. Атырау магистральдық желі бөлімшесі, вокзал шаруашылығы бөлімінің бастығы Айбек Қуанышевтың айтуынша, вокзал алды жері қала әкімдігінің құзырына қарайды. Қазіргі уақытта оның аумағында қызу жұмыстар жүріп жатыр.
Вокзал ғимаратына LED-экран орнатылып, онда облыс және қала бойынша жаңалықтар беріліп тұратын болады. Сонымен қатар жоба аясында автотұрақ аумағы кеңейтіліп, жаңа фонарьлар қондырылып, жүзге тарта шырша егіліп жатыр. Сол секілді жанында тұрған автовокзал аумағы да кеңейтіліп, онда автобустар мен жеке көліктердің кедергісіз кіріп-шығуына жағдай жасалуда. Жобада белгіленген жұмыстар жыл аяғына дейін бітеді деп жоспарланған.