Үздіктер мерейі үстем болды

Атырау жүк тасымалы бөлімшесінде мерекеге орай салтанатты шара өтіп, оған өңірде еңбек етіп жатқан теміржолшылар мен  ардагерлер қатысты.  

Бөлімше бастығы Аслан Базарғалиев көпшілікті тәуелсіздік күнімен құттықтап, биылғы жылдың бөлімше үшін жаман болмағанын алға тартты. Негізгі көрсеткіштер мен жүк тасымалы көлемі ойдағыдай орындалып, қаржылай түсім де жақсарды. Бұл әрине өңірде еңбек етіп жатқан барша теміржолшылардың елеулі еңбегінің арқасы, ұжымдардағы бірлік пен ынтымақтастықтың нәтижесі.  Атаулы күнге осындай жақсы нәтижемен жетіп отырған теміржолшылар отбасына мықты денсаулық, амандық, табыс пен молшылық тілеген басшы бірқатар теміржолшыларға марапат табыс етті. Олардың қатарында  бөлімшенің экономикалық жоспарлау бөлімінің бастығы А.Айбарова, Атырау вагон депосы персоналмен жұмыс бөлімі менеджері А.Ахбержанов, Махамбет станциясы бастығының орынбасары С.Төлегенов, Мақат локомотив депосының есепшісі О.Қаспаева «Үздік маман» белгісімен, Ганюшкино станциясының еңбек қорғау инженері Қ.Жанбуриева, Мақат локомотив депосының инженері С.Есенғужин, Атырау локомотив депосының тасымал құжаттарын өңдеу операторы С.Ольшанская «Кәсібі бойынша үздік» төсбелгісімен, бөлімшенің өндірістік-техникалық бөлімі бастығының орынбасары Н.Матаева, Атырау станциясының кезекшісі А.Алагузов, Мақат техникалық қызмет көрсету пунктінің электромонтері М.Кузекешов, Атырау локомотив депосының бөлімше шебері Ж.Утепов, Мақат локомотив депосының машинисі М.Жарылғасов «Адал еңбегі үшін» төсбелгісімен және 32 адам «Қазақстан темір жолына-120» медалімен марапатталды. Олардың арасында пойыз құрастырушы, станция бастығы, жүк кассирі, кәсіподақ қызметкері, вагон жөндеуші, т.б. бар.