Марапатқа лайық жандар

Тәуелсіздік мерекесіне орай түбек теміржолшылары түрлі марапатқа ие болды. Маңғыстау жүк тасымалы бөлімшесінде өткен салтанатты жиында аймақтың бас теміржолшысы көпшілікті мерекемен құттықтап, наградаларын табыс етті.    

Бөлімше бастығы өз сөзінде сонау тоқсаныншы жылдардың қиын-қыстау кезеңдерінен түбек теміржолы абыроймен өткенін, ол кездері Маңғыстау теміржолы тұйық жол болса, Тәуелсіздіктің арқасында соңғы отыз жылда қарыштай дамып, инфрақұрылымдар нығайып, қазір тоғыз жолдың торабына айналғанын атап өтті. «Егемендікпен жеткен игіліктердің нәтижесінде біздің өңір Қиыр Шығысқа, кейін Еуропаға шығатын үлкен қақпаға айналды. Теңіз порты арқылы бүгінде жүктер жан-жаққа тасымалдануда, өңірден өтетін жүк көлемі жылдан жылға артуда, оған теміржолшылардың қосып отырған үлесі мол. Сондықтан сіздердің әрқайсыңыз бүгін марапатқа лайықсыздар», – деді Нәжімеден Ғұбашов.

Кезек марапаттау рәсіміне жетіп, Маңғыстау станциясының жүк және багаж қабылдап-тапсырушысы Әсемгүл Түйешиева мен  Маңғыстау станциясында ТҚКП вагон қараушы-жөндеуші Байрамбай Тыныштықов «Адал еңбегі үшін», Бейнеу станциясында ТҚКП нұсқаушысы Қайрат Лұқманов пен инженер-технолог Серік Алмажановқа «Кәсібі бойынша үздік» төсбелгілерімен марапатталды.  Әлеуметтік және еңбек қатынастары жөнінен инспектор қызметін атқарып жүрген Эльвира Қалымбетова, Мөлдір Абаева, Тілектес Қаулабаева «Үздік маман» атанды. Тағы біраз адам «ҚТЖ-Жүк тасымалы» ЖШС Кәсіподақ ұйымы төрағасының Құрмет грамотасын және «Қазақстан теміржолына-120 жыл» медалін алды.