Маңғыстауда Тәуелсіздік күніне орай сайыс өтті
Маңғыстау облысы бойынша меншікті тілші
Маңғыстаулық теміржолшылар арасында Тәуелсіздік күніне орай ләңгі тебуден жарыс ұйымдастырылды. Сайысқа Маңғыстау станциясындағы мекемелерде еңбек ететін және Бейнеу теміржолынан келген сала қызметкерлері қатысты.
Жеңіс спорт кешенінде өткен сайыста бейнеуліктердің шеберлігі басым түсті. Ойын техникасын жақсы меңерген олар жүлделі орындардың бәрін қанжығаға байлап кетті. Қорытынды есеп бойынша Бейнеу техникалық қызмет көрсету пунктінің вагон қараушы-жөндеушісі Тұрар Ниязов – бірінші, екінші орынды Бейбіт Өмірғалиев, үшінші орынды Бейнеу жол дистанциясының жол жөндеушісі Ислам Құрманбаев иеленді.
– Біз бұған дейін де дәл осы спорт түрінен Бейнеудегі теміржол мекемелерінде қызмет ететін теміржолшылар арасында жарыс өткізген едік. Сол ойыннан жүлдегер болған жігіттерімізді бүгін Маңғыстау станциясындағы әріптестерімен кездестіріп отырмыз. Бүгін жеңімпаз болғандар өткен жолы да топ жарған болатын, – дейді жарысты ұйымдастырған Бейнеу теміржолшыларының спорт нұсқаушысы Бекзат Нұрәлиев.
