Ұлттық құндылықтар ұлықталды
Түркістан облысы бойынша меншікті тілші
Шымкенттегі магистралдық желі бөлімшесінде «Тіл – біздің тұтастығымыз» тақырыбында өңір теміржолшылары арасында семинар-байқау өтті.
Ел тәуелсіздігінің 33 жылдығына орай Ұлттық компания басшыларының арнайы бұйрығы негізінде ұйымдастырылған шараға жергілікті бөлімше қызметкерлері мен «Қазкөліккәсіп» ҚБ Шымкент филилалының ұжымы атсалысты.
Аймақтағы теміржол саласында тер төгіп жүрген 9 маман бақ сынаған байқауда тіл білуден бөлек, ұлттық құндылықтар мен салт-дәстүрді білуіне және оның күнделікті тұрмыс-тіршілікте қолданылуына қатысты амал-әрекеттер сынға түсті. Бая-аяғы 5 кезеңнен құралған жиын аясында қатысушылардың қарым-қабілеттері, өзін-өзі таныстыру мен салт-дәстүрді қаншалықты меңгергені сыналды. Сондай-ақ мақал-мәтел жарысы мен теміржол саласындағы кейбір термин сөздердің аудармасын білуі іс-жүзінде тапсырма орындату арқылы анықталды.
– Осы аталған төрт бағыттан бөлек, тең түскендердің ішінен үздіктерді анықтау мақсатында біз бесінші пункт ретінде еркін тақырыптағы өнер көрсету кезеңін қостық. Жалпы, мұндай шара өңір теміржолшылары арасында ұлттық құндылықтарымызды кеңінен насихаттай түсеміз. Сонымен қатар бұл байқау өңір теміржолшыларын бір сәт сергітетін тамаша байқау болды, – дейді «Қазкөліккәсіп» ҚБ Шымкент филиалының жетекшісі Нағима Салықбаева.
Жалпы тапсырма орындау мен сұраққа жауап беріп, қосымша өнер көрсету нәтижесінде ұпай санымен І орынды Арыс сигнализация және байланыс дистанциясының аға электромеханигі Қияс Тұрарұлы алды. Ал ІІ орынға Арыс вокзалының анықтама беру жөніндегі кезекшісі Ұлбала Мүслімқызы лайық деп танылса, ІІІ орын Шымкент жол дистанциясының учаске бастығы Алтынбек Исабекұлы мен Шымкент сигнализация және байланыс дистанциясының аға инженері Гүлмира Әбдімәлікқызына бұйырды.