Шыңдалу мектебі

Қызылорда магистральдық желі бөлімшесінің ұсынысымен Қазалы станциясында өткен семинар белгі беру-байланыс саласының мамандары үшін нағыз шыңдалу мектебі болды.

Семинар тақырыбы дистанциялықтардың күнделікті жұмысына арналды. «Кіріс сигналын бақылау дағдыларын жетілдіру, техникалық қызмет көрсету, сигналдық құрылғыларды есепке алу, авариялық, қалпына келтіру және пайдалану резервтерін ұстау дағдыларын жетілдіру және РТУ бақылау-өлшеу аспаптары мен бақылау жабдықтары қызметкерлерінің тәжірибе алмасуы» төңірегінде өрбіген семинарды бөлімше директоры Ербол Сәулебеков ашып, Қазалы сигнализация және белгі беру дистанциясының бастығы А.Дінахметов мекемедегі атқарылған жұмыстарға шолу жасады. Ал оның орынбасары Ж.Досжанов СОБ құрылғыларының модернизациялау деңгейі, МПЦ, «Ebilok», «Альстом» электрожетегі жұмысына шолу жасап, АСУ-Ш автоматтандырылған жүйесінде СОБ құрылғылары сигналдарын есепке алу қалай жүргізілетінін түсіндіріп өтті. СОБ, КТСМ мен радио байланысын модернизациялануы, еңбек жағдайын жақсарту мақсатында теміржолшыларға керекті жап-жаңа модульдердің пайдалануға берілгені, т.т жаңашылдықтар сөз болды.  

Сонымен қатар қатысушылар назарына Қызылорда және Қазалы ШЧ мамандары дайындаған «Нөлдік жарақат», «Vizion-Zero» 7 алтын ережесі», «СОБ құрылғысын тексеру реттілігі» тақырыбындағы баяндамалар ұсынылды. Аға электромеханик Н.Бурашевтің «Кіріс бақылауы» бейнеролигі көрсетіліп, «Қазалы ШЧ жедел резерві», «Құрылғыларды есепке алу, пайдалану» тақырыбындағы слайд-презентациялары да көпшіліктің назарын аударған дүниелер болды.  

Жалпы семинар мектебінде қос дистанция тынысымен жан-жақты танысып, пікірлескен мамандарға күн тәртібінде қарастырылған тақырыптар толық талқыланып, түсіндірілді.