Арыс қаласының әкімі теміржолшылармен кездесті

Арыс қаласының әкімі Қайсар Маңқараев теміржолшылармен кездесті. Арыс станциясының ғимаратында өткен шараға әкімшілік қызметкерлері мен теміржол мекемелерінде тер төгіп жүрген қала тұрғындары қатысты.

Кездесуде Арыс қаласының тыныс-тіршілігі мен өсіп-өркендеуі, даму жолындағы жоспар-жобалардың жүзеге асуы, сондай-ақ әлеуметтік және инфрақұрылымдық мәселелердің шешілу жолдары да кеңінен талқыланды.  

– Арыс теміржолшылар қаласы екені баршамызға белгілі. Сондықтан біз сіздермен бірге туған қаламызды көркейтіп, кейбір проблемаларды шешудің жолдарын қарастырайық деп жиналып отырмыз, – деді қала әкімі.  

Сонымен қатар шаһар басшысы бүгінде қала тұрғындарының жалпы саны 45 мыңға жуықтайтынын, оның ішінде 5 мыңнан астам азамат Арыс қаласында орналасқан ірілі-ұсақты теміржол мекемелерінде еңбек ететінін атап өтті.  

Басқосуда теміржолшылар өздерін толғандырған сұрақтарды қойып, жауабын салаға жауапты мамандардан алды. Соның ішінде жергілікті теміржолшыларды толғандырған негізгі мәселенің бірі табиғи газға қосылу жайы болды. Бұдан бөлек, көше жарықшамдары, бағдаршамдарды қалпына келтіру т.б мәселелер көтерілді.  

Әкім барлық сұрақтарды мұқият тыңдап, көтерілген мәселелер заң аясында шешілетінін және тиісті жұмыстардың жүргізілетінін жеткізді. Қала әкімі Арыс станциясының іргесінде орналасқан теміржолшылар музейін де аралап көріп, мұражайды жастар мен оқушылардың сүйікті орнына айналдыру керектігін айтты.  

Бұл музей қала тарихын зерттеп-білуге құштар жандар үшін баға жетпес мәдени ошақ болып табылады. Оның үстіне мұндағы құнды жәдігерлердің басым бөлігі теміржол тарихынан сыр шертеді. Сол себептен де мұнда мыңнан астам экспонаттан құралған арнайы «Теміржолшылар залы» жасақталған. Ал жалпы музейде 5 мыңнан астам экспонат бар.