Теміржолшылар арасында рационализаторлық ұсыныстар артып келеді

Өндірісте еңбек өнімділігін арттырудың тиімді бір нұсқасы өнертапқыштық бастамалар десек, артық емес. Соңғы жылдары еңбек нәтижесіне деген қызығушылықты ояту арқылы теміржолшыларды техникалық қызмет үшін моральдық және материалдық тұрғыдан ынталандыру күн тәртібіне шығарылады.

Атырау магистральдық желі бөлімшесінің ғылыми-техникалық ақпарат бөлімінің меңгерушісі Айгерім Бисұлтанованың айтуынша, өнертапқыштық белсенділікті арттыра отырып, техникалық шығармашылықты дамытудың маңызы зор. Нәтижесінде теміржолшылар арасында рационализаторлық ұсыныстар жылдан жылға артып, саны емес сапасы жағынан да маңызды бола түскен.  Айтуынша, өткен жылы Атырау өңірі бойынша экономикалық тиімділік талап етілмейтін 19 өнертапқыштық ұсыныс түсіп, олардың бәрі де мақұлданған.    

Солардың бірі Атырау вагон пайдалану депосының әкімшілік ғимаратына кіреберістегі «Қауіпсіздік есептегіші» ақпараттық таблосына тоқталып өтейік. Авторы – депо инженері Айгүл Құлжанова. Бұл «Қауіпсіздік есептегіші» стенді деподағы жарақатсыз күндер есебін шығарып отыру үшін ойлап табылған. Бұған дейін бұл қағаз түрінде болған, ал ол үшін күнбе-күн жаңа санды жазып, қағазды ауыстырып отыру керек болатын. Оның бәрі уақыт алатыны сөзсіз. Сондықтан да мұның электронды түрінің ойластырылуы бәрінен тиімді болғаны рас. Яғни электронды жарықдиодты таблода жарақатсыз өткізген күндер санымен қатар «Нөлдік жарақат» жолында» атты ұран көрнекі етіп жазылған. Яғни жұмысқа келген адамдар күнде таблоға қарап өздерінің жұмыс орнында өндірістік травматизмге жол бермеу қажеттігін қаперге алады. Бұл да профилактиканың, ескертудің елеулі бір түрі.  

– Электронды жарықдиодты табло 12В кернеумен жұмыс жасайды, көлемі 1,2 метр. Оған USB-флеш карта мен HD 2016 жылғы бағдарлама орнатылған. Бағдарлама автоматты түрде күндерді есептеп отырады. Біз өз мамандарымыздың рационализаторлық ұсыныстарын қолдай отырып, авторлық құқықтарын қамтамасыз етеміз. Бүгінде өндіріс талабы өскен сайын өнертапқыштық ұсыныстардың да деңгейі өсіп келеді. Баяғыдай қарапайым емес, жылдан-жылға күрделі, сонымен қатар тиімді, табысты ұсыныстар ойлап тауып, өндіріске қосып жатқан әріптестеріміздің саны артуда, – дейді бөлімшенің ғылыми-техникалық ақпарат бөлімінің меңгерушісі А.Бисұлтанова.