Ұжымдағы бірлік
Қызылорда облысы бойынша меншікті тілші
Қызылорда магистральдық бөлімше басшылығы мен кәсіподақ ұйымы ұйымдастырған шараға салалық мекемелерде еңбек етіп жүрген бір топ теміржолшылар арнайы шақырылды.
Олар – табысты еңбек етумен қатар, ұжымда моральдық психологиялық ахуалдың дұрыс қалыптасуына үлес қосып жүрген түрлі ұлт өкілдері. Теміржолда еңбектеніп, ұлттық бірлікті нығайтуға, мәдениеттер мен дәстүрлердің алуан түрлілігін сақтауға қызмет етіп, тұрақтылық пен берекенің ұйытқысы болып жүрген жандарға алғыс айтқан бөлімше басшылығы оларды жаңа жылмен құттықтап, арнайы марапаттады.
– Жоғары гуманистік мұрат – біздің қоғамда терең тамыр жайып, әртүрлі сенім мен дүниетанымдағы адамдар үшін моральдық бағдар болып табылады. Барлық дәстүрлі діндердің негізінде мейірімділік, жанашырлық, жақынға деген сүйіспеншілік сияқты негізгі құндылықтар жатыр. Түрлі ұлт өкілдерінен құралған біздің ұжымның бір мүшесі ретінде көп жылдар бойы аянбай еңбек етіп келе жатқан сіздерге алғыс айтамын. Шаңырақтарыңызда бақыт орнап, тыныштық, береке-бірлік салтанат құрсын. Бірлік бар жерде тірлік бар, – деді Қызылорда магистральдық желі бөлімшесінің бастығы Ербол Сәулебеков.
Бөлімшенің кәсіподақ ұйымының төрайымы Салтанат Махмутова кәсіподақ атынан бағалы сыйлықтар ұсынды.