Жастарға кәсіби бағдар берілді
Абай облысы бойынша меншікті тілші
Семей ЖТ бөлімшесінің персоналмен жұмыс істеу бөлімінің менеджерлері биылғы «Жұмысшы мамандығы жылына» орай арнайы іс-шаралар жоспарын әзірлеп, бастап та кетті. Жуырда кәсіби бағдар бойынша болашақ мамандық иелерімен кездесу өткізілді.
Жыл басындағы алғашқы ұйымдастырылған жиынға жалпы саны 600-ден аса 11-сынып оқушылары, биылғы түлектер жиналды. Аталмыш шараға теміржол саласына қажетті мамандар даярлайтын жергілікті Шәкәрім университеті мен Электротехникалық колледждің ұстаздары да келді.
Мамандық таңдауда сан түрлі ойда жүрген мектеп бітіруші жас буынның алдында бөлімшенің персоналмен жұмыс істеу бөлімі бастығының орынбасары Бекзат Кәрімханов сөз алып, теміржол саласындағы жұмысшы мамандығының маңызы жайында кеңінен сөз қозғады. Жалпы, «жұмысшы» деген сөздің өзі бүгінде үлкен мәртебеге айналып келе жатқанын айтқан Бекзат Нұрланұлы ұлттық компания тарапынан жұмысшыларға жасалынып жатқан қолайлы жағдай туралы да айтып берді. Облыстағы ең үлкен жұмыс беруші мекемеге аса қажетті мамандықтармен де таныстырып өтті. Теміржолшы болам деген жасқа қаладағы теміржол колледжінде оқып, жұмысшы мамандығының бірнеше түрін таңдауға мүмкіндік бар.
– Теміржолға қажетті жұмысшы мамандықтарының саны көп. Өткел кезекшісінен бастап, пойыз құрастырушылар, парк бойынша кезекші, маневр диспетчерлері, бағыттама бекетінің кезекшісі, станция операторы сынды тасымалдауды, қозғалысты ұйымдастыру және теміржол көлігін пайдалану саласына қажет мамандардан бөлек магистарльдық желіге қызмет көрсететін жолшы, белгі беру-байланыс, электрмен жабдықтаушылар, вагон мен локомотив деполарына мамандар, машинистер керек. Ең маңыздысы, теміржолда сатылы қызмет арқылы жоғары лауазымға қол жеткізу мүмкіндігі бар, – деді спикер.
Сонымен қатар облыстағы жаңа телім – Бақты-Аягөз теміржолы салынса, оның бойындағы станцияларға да мамандар қажет болатынын сөз еткен Б.Нұрланұлы түлектерді отандық теміржол саласын бірге өркендетуге шақырды.
Жиын барысы еркін форматта ұйымдастырылғандықтан сұрақ қоюшы жастар көп болды. Оқушылар әсіресе теміржолда қандай жұмысшы мамандығының жалақысы жоғары, әлеуметтік жеңілдіктер түрлері, кәсіби даму мен қызметтік өрлеу мүмкіндігі сынды өздерін қызықтырған сауалдарды қойып, жауап ала алды.
