Жұмыс киімнің бірегей үлгісі қарастырылады
Маңғыстау облысы бойынша меншікті тілші
Өткен аптада Мағыстау теміржолында теміржолшылардың жұмыс киіміне қатысты жиын өтті. Басқосу арнайы жұмыс киімдеріне, аяқ киімдерге, қорғаныс құралдарына қойылатын талаптар стандартын қайта қарастыру үшін жұмысшылардың ұсыныс-пікірін тындауды көздеді.
Жиынға ұлттық компаниядағы осы салаға жауапты басшылар да қатысты, сонымен қатар түбек теміржолшыларының арнайы киімдерін дайындайтын мекеме өкілдері де арнайы шақырылды. Осыған дейін жергілікті теміржолшылардан жұмыс формасына қатысты сын айтылған бірнеше жағдай болды. Сондықтан теміржолшылардың ұсыныс-пікірін тыңдап, арнайы жұмыс киімдерінің үлгісін «келісіп пішкен» бұл кездесудің маңызы ерекше болды.
Маңғыстау магистральдық желі бөлімшесі мен Маңғыстау жүк тасымалы бөлімшелерінің ғимараттарында екі күн бойына жалғасқан дөңгелек үстелде теміржолшылар формасының фасоны мен матасына, жалпы сапасына қатысты қызу пікірталас болды. Басқа салалардағы арнайы киімдермен салыстырып, өзгертуге, сапасын арттыруға қатысы пікірлер тыңдалды.
– Жұмысшылардың арнайы жұмыс киімдерінің стандарты қалай болу керек деген мәселе бойынша оның үлгісі мен сапасына жауапты жандарды түгел жинадық. Олар көпшіліктің ұсыныс-пікірлерін жазып алды. Бізден кейін басқа да өңірлерді аралап, барлық ескертулерді ескеріп, стандарт бойынша ортақ бір тоқтамға келіп, теміржолшылар формасының бірегей үлгісі, дизайны жасалатын болады, – дейді орталық теміржолшылар кәсіби одағының Маңғыстаудағы өкілі Сәрсенбай Есенқұлов.