Жемқорлыққа жол жоқ

Жуырда Атырау облысы бойынша жемқорлыққа қарсы іс-қимыл департаментінің мамандары Атырау жүк тасымалы және магистральдық желі бөлімшелеріне қарасты мекемелер өкілдерімен кездесу өткізді.

Департамент бастығының орынбасары Болатбек Оразов пен «Адал жол» жобалық кеңсе жетекшісі Шыңғыс Ағжанбаев теміржол көлігі саласындағы сыбайлас жемқорлықтың алдын алуға қатысты сөз қозғап, ескерту-алдын алу жұмысы сыбайлас жемқорлыққа қарсы қызметтің басым бағыттарының бірі болып табылатынын атап өтті.

– Бұқаралық ақпарат құралдарында, инстаграм, фейсбук, т.б. әлеуметтік желілерде ұлттық компанияның қызметі жүйелі түрде сынға түседі. Ең алдымен наразылық компания мен оған қарасты ұйымдарда анықталған бұзушылықтарға байланысты болады. Біздің тарапымыздан кез келген сыбайлас жемқорлықтың алдын алу бойынша жұмыстар жүргізіліп келеді, – деген Б.Оразов кейбір мысалдар келтірді.  

Жүргізілген талдау бойынша, сыбайлас жемқорлық тәуекелдері жүк және жолаушылар тасымалы саласында кең таралғаны анықталды. Заңсыз іс-әрекеттер жол жүру билеттерінің жасанды тапшылығынан, вагондарды жеткізу мерзімдерінің созылуынан, тауарлық-материалдық құндылықтарды заңсыз тасымалдаудан, дизель отынын өткізуден және т.б. көрінеді. Қазақстанның кейбір облыстарында дизель отынының ұрлығын жасырғаны үшін заңсыз сыйақы алғандар болған. Бұдан басқа, теміржол көлігі саласының лауазымды адамдары билетсіз жолаушылар тасымалын жүзеге асыру кезінде өз қарамағындағы адамдардан (пойыздар бастықтары, жолсеріктер) сыйақы алған фактілер анықталған. Сондай-ақ антикор өкілі жергілікті жердегі кейбір оқиғаларға тоқталды. Осыдан бірнеше жыл бұрын Ақжайық станциясында жүк жөнелтушілер тарапынан жүк кассирінің каспий голдына ақша аудару, бір дистанцияда туысын жұмысқа алып, оның атынан мемлекеттік сатып алуларға қатысу сынды фактілердің орын алғанын алға тартты. Бұл ретте станцияларға камера орнату қажеттігі байқалады. «Бізді жазалаушы орган деп таниды көбі, ал біз шындығында жемқорлықтың алдын алу, ескерту жасауды басты қағида деп есептейміз» деді антикор өкілі.  

Ш.Ағжанбаев өз сөзінде мемлекеттік қызметтегі мүдделер қақтығысы туралы айта келе, темір жолда жұмысқа алуда, мемлекеттік сатып алуларда, т.б. жағдайларда ағайыншылық, тамыр-таныстық деген болмауы қажеттігін ескертті.  

– Сіздермен кездескендегі біздің мақсатымыз – теміржолшылармен кері байланыс орнатып, құқықтық негізде көмек беру, қандай да бір келеңсіздіктерді болдырмау, олардың алдын алу. Сіздерді мазалаған мәселе болса, хабарласыңыздар, біз көмектесуге әрқашан дайынбыз, – деді жиын соңында құқық қорғаушылар.