Табыс формуласы
Абай облысы бойынша меншікті тілші
Ел шығысындағы теміржолшылар арасында Жұмысшы мамандықтары жылы аясында бірқатар іс-шаралар қолға алынып, нәтижелі жүргізілуде. Мақсат – жұмысшы мамандығының мәртебесін көтеру.
Жуырда Семей ЖТ бөлімшесінің кадр бөлімі мамандары облыстық әкімдік өкілдерімен бірлесіп жергілікті теміржол колледжі студенттері мен педагогтеріне арналған «Табыс формуласы» атты шеберлік сағатын өткізді.
Аталмыш шараға 200-ден аса студент пен 100-ден аса педагог қатысты. Басқосуға сондай-ақ электротехникалық колледждің түлектері, қазіргі таңда аймақтағы ірі кәсіпорындарда лауазымды қызмет атқарып жүрген кәсіби мамандар да арнайы шақырылды. Олар жұмысшы мамандығы жылы аясында өз пікірлерімен бөлісті.
Семей ЖТ бөлімшесінің персоналмен жұмыс бөлімі басшысының орынбасары, осы колледждің түлегі Бекзат Кәрімханов теміржол саласы мамандарының кәсіби құзыреттері жайлы кеңінен әңгімелеп берді. Сондай-ақ жетістікке жету жолындағы өз тәжірибесімен де бөлісті. Бүгінгі таңда жастар үшін қатардағы жұмысшы болу сәнге айналып келе жатқанын жеткізген Бекзат Нұрланұлы ұлттық компания тарапынан қызметкерлерге жасалып жатқан әлеуметтік жеңілдіктер жайын да кеңінен сөз етті.
Тоқтала кетсек, қазіргі таңда Семей теміржолында осы оқу орнының түлектері көптеп еңбек етуде. Теміржол бөлімшесімен іскерлік һәм мәдени байланыс та жоғары деңгейде. Колледж түлектерінің барлығы дерлік бөлімшеде іс-тәжірибеден өтіп, шеберліктерін қалыптастырады.
Шеберлік сағаты барысында қатысушылар спикерлерге сұрақтар қойып, олардың студенттік өмірі мен кәсіби жетістіктері туралы пайдалы мәліметтер алды. Интерактивті форматта өткен шара, сөз жоқ, болашақ жас мамандарға кәсіби даму жолындағы бағыт-бағдарларын айқындауға зор мүмкіндік берді.