Электровоз жабдықтарын тарту етті
"Қазақстан теміржолшысы" газетінің Жамбыл облысындағы меншікті тілшісі
Жамбыл жүк тасымалы бөлімшесі Тараз көлік және коммуникация колледжіне электровоз жабдықтары мен аппараттарын тапсырды.
Колледж директорының оқу-өндірістік ісі бойынша орынбасары Жеңіс Тайбеков әлеуметтік серіктестің қайтарымсыз берген электровоз жабдықтары мен аппараттары колледждің материалды-техникалық базасын толықтырғанын жеткізді.
– Жамбыл локомотив пайдалану депосы басшысының міндетін атқарушы Мәди Қонысбаев әкеліп тапсырған жабдықтар студенттеріміздің заманауи технологияларды толық меңгеруіне мүмкіндік береді, техникалық және кәсіптік білім беру жүйесінің маңыздылығын арттыруға бағытталған маңызды қолдау болды, – деді ол.
Теміржол саласын орта буын мамандармен қамтамасыз етіп отырған кәсіптік білім беру мекемесінің әлеуметтік серіктесі болып табылатын Жамбыл ЖТ бөлімшесі колледжге жиі көмек қолын созып, қолдау көрсетіп келеді. «Жұмысшы мамандықтар жылына» орай қос тарап екіжақты меморандум жасасқан болатын. Онда студенттердің білім беру бағдарламасын толық игеру үшін қажетті қолдау көрсету туралы тармақ қарастырылған. Нәтижесі студенттердің теориялық білімдерін практикалық дағдылармен ұштастыруға мүмкіндік береді.
– Бөлімше басшысы Айдын Сеитбенбетовтің ұсынысымен колледжге практикалық дәрістерде қолдану үшін электровоз жабдықтарын бердік. Оқу орнының еңбек нарығында сұранысқа ие, техникалық және кәсіптік білімі бар бәсекеге қабілетті кадрларды даярлау миссиясына қолдау жасау – әлеуметтік серіктес ретінде біздің міндетіміз, – дейді Жамбыл локомотив пайдалану депосының бастығы Мәди Қонысбаев.