Семейде 366 шақырым жол күрделі жөндеуден өтеді
Абай облысы бойынша меншікті тілші
Семей магистральдық желі бөлімшесі бойынша өткен жылғы атқарылған жұмыстар қорытындыланып, осы жылы іске асырылуы тиіс іс-шаралар жоспарланды.
Бөлімше басшысы Айдын Шәукежановтың айтуынша, өткен жылға алға қойылған негізгі тапсырмалар толық орындалған. Әсіресе транзиттік әлеуетті арттыру, сонымен қатар пойыздар жылдамдығын жоғарылату мақсатында ағаш негізді шпалдарды темірбетонға ауыстыру арқылы жол инфрақұрылымын жаңғырту жұмыстарына басымдық берілді.
– Мемлекет басшысы Қасым-Жомарт Тоқаев қаңтардың 28-і күні болып өткен Үкіметтің кеңейтілген отырысында еліміздің көлік инфрақұрылымын дамытудағы басым бағыттарды атап өтіп, Қазақстан аумағы Орталық Азия мен Қытай арасындағы жүк айналымын ұлғайтуға қолайлы екенін еске салды. Мұнымен қоса, күре жолдың қозғалысы аса көп учаскелерін қайта жаңғырту керектігін жеткізді. Бұл бағытта бізде өткен жылы бірқатар жұмыстар жасалды. Келісімшарт бойынша жаңа материалдармен 61,1 км күрделі жөндеу, ескі шпалдар торымен жолды қарқынды орташа жөндеу 11,2 км, орташа жөндеу 19,5 км телімде жүргізілді. Бағыттама бұрмаларын жаңа темірбетонға ауыстыру арқалықтары 63 жиынтық болды. Сондай-ақ R-43,50 типті рельстерді R-65-ке ауыстыру арқылы 15 км жолда жаңғырту жұмыстары жүзеге асырылды, – дейді Айдын Мақсұтбекұлы.
Бұл бағыттағы іс-шаралар биыл да жалғасады. Жалпы темірбетонды жол төсемдеріне толық көшу үшін алдағы жылдары 366 шақырым жолға күрделі жөндеу жұмыстары жоспарланып отыр.
Сонымен қатар желі бойындағы инфрақұрылымдарды жаңарту, абаттандыру да қатар жүргізілмек. Өткен жылы бөлімше теңгеріміндегі екі металл көпір сырланған. Биылғы шаралар жуық арада нақтылануы тиіс.
Желі бойында санитарлық-тұрмыстық ахуалды жақсарту үшін 2023 жылдан бастап бүгінге дейін 39 модульдік ғимарат орнатылыпты. Биыл да жалғасады. Сондай-ақ өткен жылы «Теміржолсу-Аягөз» ЖШС бөлімшеге қарасты 22 ғимаратқа толық көлемде ағымдағы жөндеу жұмыстарын жүргізді. Биылғы жылға да межеленген ауқымды жоспар бар.
Бөлімше басшысы соңғы жылдары қолданыстағы автотракторлық көлік паркін жаңалау да қарқынды жүргізіліп жатқанын жеткізді. Өткен жылы 13 бірлік жүк-жолаушы көліктері, қалпына келтіру жұмыстарын атқару үшін бір Т-35 бульдозері, сонымен қатар салмақ көтергіштігі 150 тонна болатын бір теміржол краны алынған. Десек те, кейбір мекемелер бойынша техниканың қажеттілігі әлі де сезілуде.