Оқушылар темір жолмен танысты
Маңғыстау облысы бойынша меншікті тілші
Маңғыстау станциясындағы желілік полиция бөлімінің қызмет атқару аумағында Көліктегі қауіпсіздік жедел профилактикалық іс-шарасы өткізілді. Оның аясында мектеп оқушыларына «Темір жол – аса қауіпті аймақ!» тақырыбында дәріс оқылып, темір жолға танымдық саяхат ұйымдастырылды.
23-25 қаңтар аралығында өткен шара аясында желілік полиция өкілдері мектеп оқушыларымен кездесіп, теміржол аумағында жарақаттанудың алдын алу, құқық бұзушылықты болдырмау және қоғамдық қауіпсіздікті қамтамасыз ету тақырыбында Мұнайлы аудандық №1 жалпы білім беру мектебінің оқушыларына арнайы дәріс өткізді. Сонымен қатар бастауыш сынып оқушыларына Маңғыстау теміржол вокзалына танымдық саяхат ұйымдастырып, темір жолдағы қауіп-қатермен таныстырып, жол белгілерінен түсінік берді.
– Профилактикалық жұмыстар барысында оқушыларға темір жолдың белгіленбеген жерлерінен өтуге болмайтыны ескертіліп, темір жолға жақындағанда құлаққапты шешу керегін, онымен жолдан өтемін деп өміріне қауіп-қатер туындатпау туралы жан-жақты ақпарат берілді. Темір жолдың арғы бетіне өту үшін қандай белгілерді басшылыққа алу керектігі көрсетіліп, ескертпе буклеттер таратылды. Мектеп оқушыларымен мұндай профилактикалық жұмыстары алдағы уақытта да жалғасады, – дейді Маңғыстау ст. ЖПБ ӘПб профилактика инспекторы А.Тойлыбаева.