Қармен күрес қарқынды жүріп жатыр
Абай облысы бойынша меншікті тілші
Теміржолшылар табиғаттың тосын мінезімен бетпе-бет келуде. Қазіргі күндері шығыста «қыс шілдесінің» соңғы күндері өтіп жатыр. Қарлы боранның соңын ала аяз күшіне мініп, әсіресе жол шаруашылығы мамандары үшін сынақ күшейіп тұр.
Айта кетерлігі, Семей өңірінде соңғы тәуліктерде бір айлық нормадағы қар жауды. Мамандардың сөзіне сүйенсек, 30-31 қаңтар күндері аймақта 10,5 ммден асатын қар жауыпты, ал бір айлық норма 11,4 мм құрайды. Ал 1 қаңтардан бастап бүгінге дейін жауған қар – 25,1 мм. Кей аймақтарда желі бойына 1 метрге жуықтайтын қар түскен.
Қазіргі таңда әсіресе станциялық жолдарды қардан тазалау шаралары қарқынды. Сонымен қатар станциялық жолдар бойынша қар шығару жұмыстары жалғасуда. Әсіресе тораптық жүк станцияларындағы іс-шараларға бірінші кезекте мән берілуде.
Қыс басталғалы бері қозғалыс жиілігі аса жоғары Семей және Жаңа-Семей станцияларын қоса алғанда қала ішінен 30 мың текше метрге жуықтайтын көлемде қар шығарылыпты. Бұл ретте негізінен жол машиналары пайдаланылуда.
– Басты мақсат – жүк және жолаушылар пойыздарын кідіртпеу. Бұл ретте жолдарды тазалау жұмыстары түнгі мезгілде де жүргізілуде. Мәселен, тек Семей станциясының басында ғана бір түнде екі машина жұмыс істеп, 500 текше метрден астам қар қала шетіне шығарылды. Соңымен қатар, сол аязбен жылы күндер кезек алмасып, оның үстіне қалың қар төпеп тұрғандықтан бағыттамалы бұрмаларға мұз қату жиілеген. Сондықтан да жүк станциялары басында пневмоүрлегіш тоқтаусыз жұмыс істеп тұр десе де болады, – дейді ПЧ-39 мекемесінің бас инженері Мырзабек Керейбаев.
Айтуынша, бүгінгі таңда НЖС-6 бөлімшесі бойынша байтақ желі бойында пневмоауаүрлегіштердің 366 бірлігі қалыпты жұмыс істеп тұр. Таяу күндері бөлімшеге қарасты станцияларда жылдағы дәстүрге сай көлемді түрдегі қар сенбіліктерін өткізу жоспарланып отыр. Оған желі бойындағы барлық теміржолшылар, кеңсе қызметкерлері де жұмылдырылмақ. Бұл орайдағы басты мақсат – көктемгі мезгілдегі еріген қар суынан болатын қауіпті азайту. Оның аясында бөлімшеге қарасты 440 көпір, 368 құбыр мен 181 шақырым арық, 1216 км су арналарын қардан тазарту жұмыстары басталмақ.
– Жуырда облыс әкімінің төрағалығымен өткізілген жиынға қатыстық. Көктемгі су тасқынына даярлық шаралары пысықталды. Бұл ретте ұлттық компания басшылығының арнайы бұйрығын күтіп отырмыз. Оның аясында нақты шаралар қабылданатын болады. Жылда атқарып жүрген жұмыс. Тек биылғы жылы өңірімізге түскен қардың мөлшерден көп болуы себепті ерекше басымдық берілетін болады, – дейді бұл орайда НЖС-6 басшысы Айдын Шәукежанов.
Ал қазіргі күндері бөлімше көлеміндегі пойыздар қозғалысы штаттық режимде жүргізіліп жатыр. Қалааралық автобус қатынасы тоқтап тұрғандықтан әсіресе Семей, Шар, Жаңғызтөбе, Аягөз теміржол вокзалдарында жолаушылар нөпірінің әдеттегіден тыс, біршама артқаны байқалады. Өткен тәулікте Семей ЖТ бөлімшесі басшысы Алмас Сейсемқанов желі бойын аралап, қармен күрес шараларын жеке бақылап қайтты. Жалпы, жергілікті теміржолшылар қауымы жұмыла жұмыс жүргізіп, қысқы маусымды тосын оқиғаларсыз өткізуде.