Көктемгі су тасқынына дайындық басталды
Ақтөбе облысы бойынша меншікті тілші
Ақтөбеде төтенше жағдайлар департаментінің ұйымдастыруымен алдағы су тасқыны және тілсіз жаудан сақтанудың өзекті мәселелері талқыланған жиын өтті.
Шараға облыстағы осы салаға жауапты барлық мекеме, соның ішінде темір жолдағы өрт қауіпсіздігі қызметінің өкілдері де қатысты. Кеңес отырысында су тасқынының алдын алу, дайындық жұмыстары көтеріліп, ұсыныстар тыңдалды.
Ақтөбе мемлекеттік емес өртке қарсы қызметінің бастығы Әділ Құбаевтың айтуынша, өртке қарсы қызметіне қарасты жасақтар теміржол бойындағы 1512 км аумақты тілсіз жаудан қорғау миссиясын абыроймен атқарып келеді.
«Бүгінгі таңда жазға дайындық жұмыстары жүруде. Жоспарға сай арнайы тексерулер тұрақты өтеді. Өткен жылы өрт сөндіру пойыздарының, ТЖД және теміржол мекемелерінің қатысуымен 27 оқу-жаттығу жиыны өтті. Теміржол аумағында 2618 тексеріс жүргізіліп, нәтижесінде 2404 өрт қауіпсіздігі ережесінің бұзылуы анықталды. Инспекторлар мекеме басшыларына 161 ескерту жолдады», – деді Әділ Құбаев.
Өртке қарсы қызмет инспекторлары жылжымалы құрамдарды жылына кемі екі рет тексеруге міндетті. Бұл жұмыстар қауіпсіздікті арттырады. Мамандардың айтуынша, өрттің шығу себептері негізінен тоқ жүйесінің ережеге сай болмауынан болады. Яғни қысқа тұйықталу, электр қуатының шамадан тыс жүктелуі электрқыздырғыштарды қараусыз қалдыру жағдайлары үнемі бақылауда болу керек.