Студенттер теміржолшы мамандығымен етене танысты

Тараз қалалық Жастар ресурстық орталығының ұйытқы болуымен Тараз теміржол көлік және коммуникация колледжінде «Еңбекпен тапқан бақытын» атты тағлымды іс-шара өтті.

«Жұмысшы мамандықтар жылына» орай ұйымдастырылған шараға

Жамбыл локомотив пайдалану депосының машинисі Жандос Қарғабаев, Тараз вокзалының, Тараз станциясының білікті мамандары Назым Бейсенова мен Нигора Сәрсекеева қатысып, болашақ теміржолшылар алдында сөз сөйледі. Бұлардың бәрі кезінде осы оқу орнынан түлеп ұшқан түлектер екен. Басқосуда студенттерге кеңес беріп, тәжірибелерімен бөліскен теміржолшылардың айтуынша, еңбек нарығын жұмысшы мамандықтарсыз елестету мүмкін емес. Соның ішінде теміржолшы мамандығының рөлі басым. Ел экономикасының күретамыры саналатын салаға мамандар даярлау да, бұл салада еңбек етіп, сенім мен жауапкершілік үдесінен шыға білу де оңай емес.  

– Сондықтан осы салаға табан тіреп, теміржолшы болуға бел буған екенсіңдер, болашақта кәсіптеріңді терең меңгеріп, мамандықтарыңның шебері болуды мақсат етіңдер. Сонда ғана өз орындарыңды тауып, өздеріңе сенімді болып, еңбектің жемісін көресіңдер, – дейді машинист Жандос Қарғабаев.

Ашық диалог форматында өткен кездесуде жастардың аға-әпкелеріне қойған сұрақтары да аз болмады. Студенттер теміржол саласында жастар саясаты шеңберінде қандай қолдау-көмектер көрсетілетінін білді. «Қазақстан теміржолы» ҰК» АҚ бастамасымен жастар саясаты шеңберінде түрлі өңірлік, республикалық кеңестер, форумдар, дөңгелек үстелдер, семинарлар өткізіліп тұратыны айтылды.