Сексеуіл локомотив пайдалану депосында тәртіп талқыға түсті
Қызылорда облысы бойынша меншікті тілші
Батырхан Базарбаев басқаратын Қызылорда ЖТ бөлімшесіне қарасты Сексеуіл локомотив пайдалану депосында станциядағы құзырлы орган өкілдері кеңейтілген жиын өткізіп, ұрлық-қарлыққа қарсы күресті күшейту жайын талқылады.
Депо бастығының өндіріс жөніндегі орынбасары Еркебұлан Аяғанов алғашқы сөз кезегін алып өткен жылы орын алған жанармай ұрлығы туралы баяндады. Кінәлілер құқық қорғау органдары тарапынан құрықталып, тергеу амалдары жүріп жатқанын мәлімдеді. Мұндай келеңсіздіктердің қайталанбауын қамтамасыз ету үшін нақты қадамдар жүргізіліп жатқанын айтып, теміржолшылардың жауапкершілігін арттырудың және бақылауды күшейтудің маңыздылығына тоқталды.
Жиында «ҚТЖ-ЖТ» серіктестігі Басқарма төрағасының орынбасары Т.Алдыбергеновтің 2025 жылғы 12 ақпандағы №006А жеделхаты таныстырылды. Құжатта қозғалыс қауіпсіздігін сақтау, жанармай ұрлығына қарсы күрес және жауапкершілікті арттыру міндеттері көрсетілген. Құқық қорғау органдары тарапынан жергілікті полиция бөлімшесінің учаскелік инспекторы Ақбар Бекниязов пен желілік полиция бөлімшесінің аға сержанты Жеңісбек Сағынаев сөз алып, кез келген қылмыс, құқықбұзушылық болсын, заң алдында жауапқа тартылатынын ескертті. Олар теміржол нысандарында тәртіпті сақтау мен заң бұзушылықтың алдын алу үшін бірлесе жұмыс істеуге дайын екендіктерін жеткізді.
«ҚТЖ-ЖТ» ЖШС «Отын ресурстық орталығы» филиалы Сексеуіл отын қоймасының шебері Ақылбек Аяпов қоймадағы отынның қатаң бақылауда және есеппен босатылатынын атап өтті. Оның айтуынша, қауіпсіздік шаралары мен есеп жүйесі отынның заңсыз пайдаланылуына жол бермейді.
Жиында сөз алған ТҚК-2 ауысым жөндеушісі Рысбай Рзағазиев пен аға шебер Сайфғали Балтамбаев депо ұжымы үшін абырой бәрінен жоғары екенін, сол себепті кез келген құқық бұзушылық әрекеттерге жол берілмейтінін мәлімдеді. Олар заң талаптарын мүлтіксіз орындап, ұрлық фактілерінің нөлдік деңгейін ұстанатындықтарын жеткізді.
Еркебұлан Аяғанов әсіресе теміржолшылар арасында ұрлықтың жолын кесу маңызды екенін айтты. Ол үшін жанар-жағармайды қатаң есепке алу, бақылау мен тексеруді жүйелі түрде жүргізу қажет. Бұл теміржолшылардың жауапкершілігін арттырып, ұрлық жасаудың мүмкіндігін азайтады. Депоның абыройын сақтау тек техникалық бақылаумен ғана емес, сондай-ақ теміржолшылардың моральдық жауапкершілігін арттыру арқылы мүмкін болады деп санайды өндіріс жетекшісі.
Жиын жанар-жағармай ұрлығының алдын алу үшін арнайы шаралар қабылдап, бақылауды күшейту және жүйелі түрде тексерулер жүргізу қажет деген ұйғарым жасады. Бақылау мен тексеру қатаңдатылып, машинистер қауымының ұрлық-қарлық жасауына жол бермеу, еңбек қауіпсіздігін сақтау, өндіріс тиімділігін арттыру мақсатында кешенді жұмыстар күшейтілмекші.
