Атырау станциясында қуат қондырғылары жаңарды

Атырау станциясында соңғы отыз жыл бойына қолданылып келе жатқан қуат қондырғыларын жаңарту жұмысы жасалды. Телімдегі қозғалыс қауіпсіздігіне тікелей әсер ететін жұмысқа станциядағы барлық құрылым атсалысып, арнайы толаскез аясында жұмыла жұмыс істеді.

Атырау белгі беру және байланыс дистанциясының бастығы Ербол Нұрмановтың айтуынша, станциядағы қуат көздері панельдері жаңартылып, оның жұмысы бұрынғыдан да жақсара түспек. Айтуынша, 320-514 км аралығындағы жұп және тақ бағыттағы жолдарда тоқ көзі түгелдей ажыратылып, бұрынғы ПВ-1, ЭЦК, ПРББ, ПВ-220, ПВ-24 қондырғылары жаңа типтегі ППЭЦ-70 түріне ауыстырылды. Сол себепті 12-16 қараша аралығында ЭЦ постындағы барлық СОБ құрылғылары өшіріліп, Атырау – Махамбет, Атырау – Теңдік, Атырау – Ақжайық аралығындағы автобұғаттау, 515-шақырымдағы өткел автоматикасы жабылған.  

Сонымен қатар бұрынғы функцияларымен қоса ол енді автоматты түрде қосылатын және оны бақылайтын операциялармен толықтырылған. Мәселен, бір фидер ажыратылған жағдайда екіншісі, егер ол да ажыратылса, дизельді агрегат автоматты түрде іске қосылып, станция жолдары қуат көзімен үнемі қамтамасыз етіліп отырады. Осындай жұмыстар жүріп жатқанына орай жұп және тақ бағытта жүретін пойыздардың қауіпсіздігін қамтамасыз ету мақсатында барлық жұмыстар қолмен атқарылып, оны атқаруға ПЧ, ШЧ, вагон, локомотив деполары, станциялар қосымша адамдар бөлді. Яғни пойыз құрастырушы, вагоншы, жолшы, машинист, т.б. мамандықтар бойынша адамдар тартылып, барлығы «бір жеңнен қол, бір жағадан бас шығарып» дегендей әрекет еткен.  

– Толаскез кезінде станцияда барлық жұмыстар қолмен атқарылып, барлық құрылымдар атсалысты. Бұрын электрлендірілгендіктен бұрма, бағдаршам, табло, т.б. жұмыстарға қам жемейтінбіз. Енді бізге үлкен жауапкершілік жүктеліп, электр қуатынсыз жұмыс істеуге тура келді. Станцияда 4 пост құрдық, сол бойынша барлық бұрмалар қолмен атқарылып отырды. Басқа станцияларда да бағдаршам, бұрмалар, жалпы, қуат көзіне тәуелді жұмыстардың барлығы сол кезде қолмен жасалып, 5 күнге жоспарланған жұмыс 3 күнде мерзімінен бұрын аяқталды. Үлкен сыннан абыроймен өттік. Жұмыс барысында электрлік орталықтандыру құрылғыларының қоректендіру кабельдері мен трансформаторлары жаңарды. Енді ол болашақта ақаулардың аз болуына себепші болады. Алда-жалда бір ақау болған жағдайда ол ақаудың тарихы толықтай жазылып қалады. Станцияда 65 бұрма бар, солардың бәрі «толаскез» кезінде толықтай қолмен жасалды. Ал дөңес толық тоқтады. Вагондарды дөңестен жібермей, тепловозбен жай-жай итеріп отырып жұмыс жасаған ТЧЭ-3, ТЧЭ-4 деполарының машинистері кәсіби шеберлік танытты. Сондай-ақ Мақат, Ганюшкино, Құлсары станцияларына пойыздарды реттеп жіберіп отырды. Қондырғыларды жаңарту, ауыстыру жұмыстары 14 ақпан күні сағат 17:45-те толық тексерістен өткізіліп барып аяқталды, – дейді Атырау станциясының бастығы Бекжан Жиенбетов.