Теміржолшы мамандарын дайындайтын екі оқу орны меморандум жасасты
"Қазақстан теміржолшысы" газетінің Жамбыл облысындағы меншікті тілшісі
«Жұмысшы мамандықтар жылына» орай теміржол саласын кәсіптік-техникалық білімі бар орта буын мамандармен қамтамасыз етіп келе жатқан Тараз және Қарағанды колледждері өзара іскерлік байланыс туралы келісім жасасып, ынтымақтастық туралы меморандумға қол қойды.
Қарағандылық әріптестер ғасырға жуық тарихы бар Тараз теміржол көлік және коммуникация колледжінің жұмысымен танысып, тәжірибе алмасу үшін Жамбыл жеріне арнайы келді. Арқадан келген оқытушылар Тараз колледжінің материалдық-техникалық базасына қызығушылық танытты. Олар тәжірибе алаңындағы виртуалды жаттығу құрылғыларының жұмысымен танысып, оқу процесінде пайдаланудың тиімділігі көп құрылғы қызметіне тәнті болды. Ол теориялық білімді практикада қолдануға мүмкіндік береді. Нәтижесі де жоғары. Қарағандылықтар құрылғыны сатып алып, білім беру үдерісіне енгізетіндерін айтты.
Қос колледждің басшылары теміржолшы мамандарды даярлауда бірлесе жұмыс жасауға, теориялық және тәжірибелік біліммен алмасуға, ғылыми-зерттеу жұмыстарда ұзақ мерзімді, тиімді ынтымақтастықты дамытуға ниетті.
Қарағанды теміржол колледжінің іргесі 1965 жылы қаланған. Алғаш №139 қалалық кәсіби-техникалық училище болып ашылған. Қазіргі таңда онда 427 студент білім алуда. Конкурс бойынша теміржолшы мамандықтарына бір орынға 2 адамнан келеді. Жалпы 29 педагог және 21 өндірістік оқыту шебері жұмыс істейді.
Ал Тараз теміржол көлігі және коммуникация колледжі – Жамбыл облысындағы ең көне оқу орындарының бірі. Түрксіб құрылысы басталғанда, салаға бейінді мамандарды даярлау мақсатында алғаш 1930 жылдардың басында кәсіптік мектеп болып ашылған. 1940 жылы Жамбыл теміржол училищесі болып қайта құрылды. Бүгінгі күнге дейін колледж 50 мыңнан астам маманды даярлап шығарған.