Өрт сөндіру пойызы көмекке келді
Абай облысы бойынша меншікті тілші
Өткен сенбінің кеші семейліктер үшін біршама қарбаласқа толы болды. Семей станциясының дәл іргесіндегі астық өңдеуші компанияның аумағында күнбағыс тұқымын сақтайтын қоймада үлкен өрт орын алды.
Оқиға орнына дереу жеткен жеке құрамның 65 адамы мен 24 техника қызыл жалынды ауыздықтау жұмыстарын барынша қауырт жүргізгенімен, апат ошағына өрт сөндіру пойызының көмегі қажет болды.
Белгілі болғандай, қоймада сақталған 500 тоннадан асатын күнбағыс өнімі өртенген. Жылдам жанатын өнім қатты түтіндеп әрі өте қызулы болғандықтан сөндіру жұмыстары қиындық тудырды. Аумақты, қала аспанын қою түтін басты.
Кешкі 19:00-де тілсіз жау ошағына Семей станциясының өрт сөндіру пойызы келіп жетіп, барлық қажетті көмек түрлерін көрсетті. Өртті сөндіруге жалпы көлемі 200 тонна су жұмсалынды.
Төтенше жағдайлар қызметі мен теміржолшылардың жұмыла жұмыс жүргізуінің нәтижесінде қызыл жалынның жақын маңайдағы өзге ғимараттарға таралуына жол берілмеді. Әйтсе де, күш алған өрт, қою түтін, ғимарат конструкциясының күрделілігі өшіру жұмыстарын біршама қиындатты. Түнгі 00:13-те тілсіз жауы толықтай сөндірілді. ТЖМ қызметі таратқан ақпаратқа сүйенсек, апат аумағы 1600 шаршы метрді қамтыған. Зардап шеккендер тіркелмеді. Шығын көлемі есептелуде.
Ал жақын маңайдағы Семей станциясының ғимараты мен станция паркіне, теміржол нысандарына ешқандай залал келген жоқ. Қызмет барысы штаттық режимде жүргізілді. Жылжымалы құрам қозғалысына да еш нұқсан келмеді.