Теміржолшылар «Қазақша Quiz» жүлдегері
Абай облысы бойынша меншікті тілші
Семейлік теміржолшылар облыстық «Қазақша Quiz» интеллектуалдық ойынына қатысып, жүлделі орынды иемденді.
Абай облыстық лингвистикалық орталығының ұйымдастыруымен Халықаралық ана тілі күніне орай аймақтағы іргелі ұжымдар арасында өткен шараға семейлік теміржолшылар «Асыл сөз» командасын үкілеп жіберді. Интеллектуалдық сайысқа жергілікті ҚР ҰҚК, ҚР ІІМ, ҚР Қорғаныс министрлігі, ҚР ТЖМ, облыстық Қан орталығы, республикалық Абай мұражайы, Назарбаев зияткерлік мектебі сынды алпауыт мекемелердің ұжымдары қатысқандықтан кіл мықтылар арасынан жеңімпаздарды анықтау оңайға соқпады.
Десек те, осыған дейін де сан түрлі білім бәсекелеріне қатысып, қоржынға жүлде салып жүрген теміржолшылар намысты қолдан бермеді. Қойылған логикалық сұрақтарға жауап беруде ТЧЭ-24 мекемесінің кадр бөлімінің маманы Ардақ Тергемесова бастаған теміржолшылар тапқырлық таныта білді.
– Сайыс барысында теміржол саласында да ана тілі үстемдікке ие екендігін дәлелдеп, біздің қызметте де қазақ тілінің қолданыс аясы кең екендігіне көпшіліктің көзін жеткіздік. Сан түрлі сауалдарға жауап беру үшін ұлттың таным-түсінігіне лайықталған логикалық сұрақтардың шешімін таба білуің керек. Ал, біз техникалық сала болсақ та ұлт руханиятына қатысты сауалдарға жауап таба білдік, – дейді Ардақ Тергемесова.
Осылайша семейлік теміржолшылардың «Асыл сөз» командасы «Қазақша Quiz» интеллектуалдық ойынында жүлделі үшінді орынды иемденіп, Алғыс хатпен және арнайы жүлдемен марапатталды.