Айгүлдің тілегі

Ол таң сәріден тұрып, жұмысқа дайындалды. Балаларды оятып, немерелеріне таңғы асын даярлап болып, жұмысына асыққан Айгүл станцияға аяңдап келеді. «Бүгінгі күн де тыныш, оқыс оқиғасыз өтсе екен» деген оймен жұмыс орнынан келісімен киімін ауыстырып, ауысымды қабылдап алды.  

Иә, бұл – әр жыл, ай, апта, күн сайын жұмысқа түсерде тілейтін тілегі.  Өйткені қозғалыс қауіпсіздігі қай теміржолшы үшін де ең маңызды нәрсе. Оның үстіне заты әйел, ана емес пе, ең алдымен жаратушыдан жұмысы көлденең апатсыз, адамдар аман, қауіп-қатерсіз еңбек етіп, амна-есен үйлеріне оралғанын тілейді. Ақжайық станциясының белгі берушісі (сигналист) Айгүлдің тағы бір еңбек күні осылай басталды.

Жұмашева Айгүл тоғыз жолдың торабы, Атырау жол бөлімшесінің жүрегі саналатын Мақат станциясында 1971 жылы дүниеге келген. Теміржолдың тарсылын, пойыздардың гүрсілін, самсай тіркеліп, шұбатылған вагондарды көзін тырнап ашқаннан көріп өсті.  Әкесі Жақсылық Мақат локомотив пайдалану депосында машинист болған адам. Ес біле әкесінің алып тепловозды жүргізгенін мақтаныш етіп, өсе келе өзі де осы жолды таңдады. Теміржолшы болудың қызығы мен қиындығын іс жүзінде танып білді.

– Өмірімді теміржолмен байланыстырғаныма өкінбеймін. Марқұм жолдасым Аманқос та осы Ақжайық станциясында пойыз құрастырушы болды. Бүгін күндізгі ауысымға келіп жатырмын. Станцияға келген пойыздарды пойыз құрастырушылар бөліп, сұрыптаған кезде бірге болып, вагондарға башмақ қоямыз. Ол өте маңызды жұмыс, вагондар жылжып кетсе, үлкен қауіп тудырады. Сондықтан үнемі қырағы болу керек. Рациямен байланысып, қай вагонның қай жерге қойылғанын, қашан алынатынын хабарласып отырамыз. «Сақтансаң сақтаймын» демекші, үйреншікті жұмыс болғанымен, босаңсуға негіз жоқ, – дейді ол.  

Отбасында төрт қыз, бір ұл бар. «Жердің тайғақ болғанын мұздан көрдім, еттің ащы болғанын тұздан көрдім, қартайғанда рахатты қыздан көрдім» деп Шернияз ақын айтқандай, жас келіншек кезінде  қызды көп тудым, ұлым жалғыз деген екен, Айгүл бүгінде қызықты сол қыздарынан көріп отырған жайы бар. Қыздарын құтты орнына қондырып, 13 немере-жиен сүйіп отырған бақытта әже. Отағасын жоқтатпай, туған-туыс, құда-құдағиларымен жақын араласып, сыйластықта ғұмыр кешуде. Ұжымдастар арасында беделді, суреті бөлімшенің құрмет тақтасына ілінген. «Жұмысыма ризамын. Тұрақты табысымыз бар. Көрсеткіш орындалса, сыйақы да алып отырамыз. Әйелдер мерекесі – 8 наурызда барлық үйге дастархан молдығын берсін. Қымбастшылық қысып жатыр, әсіресе тамақ қымбаттап жатса, қалай болар екен деп уайымдап қалатынымыз да рас. Мемлекет тарапынан әйелдерге қамқорлық көбейе берсін. Бақытты ел болайық», – дейді Айгүл. Бұл да Айгүлдің аналық ақ тілегінің бірі. Лайым, қабыл болғай...