Ерекше форматтағы мереке

Қызылорда магистральдық желі бөлімшесі 8 Наурыз –Халықаралық әйелдер күні ерекше сән-салтанатпен атап өтті. Теміржолшы ер-азаматтар бұл жолы нәзік жандыларға тосын сый жасап, мерекені ерекше форматта ұйымдастырды.  

Мерекелік шара таңертеңнен басталды, бөлімше басшылары мекемеге қарасты бекеттер мен учаскелердегі қызметкерлерді құттықтап шықты. Бөлімшедегі әрбір цех, пункт, желі және телімдерде еңбек ететін әйелдер қауымына гүл шоқтары мен сыйлықтар табыс етілді, мерекелік марапаттар тосын сый ретінде ұсынылды. Мекеме ғимараты да ерекше безендіріліп, салтанатты атмосфера қалыптасты. Түске қарай мерекелік жиын бөлімшенің мәжіліс залында жалғасты. Бөлімше басшысы Ербол Сәулебеков нәзік жандыларды төл мерекесімен құттықтап, олардың еңбегін жоғары бағалады.

– Теміржол саласы жауапкершілігі мол, табандылық пен төзімділікті талап ететін сала. Қызығы мен шыжығы қатар жүретін саланың жұмысы ерлермен бірдей әйелдер қауымынан да темірдей тәртіп, аса жауапкершілікті талап етеді. Саламызда әйелдер қауымының еңбегі ерекше құрметке лайық. Олар отбасы мен жұмысты қатар алып жүрген асыл жандар. Сондықтан оларға айтар алғысымыз шексіз. Сіздерді мақтан тұтамыз! Теміржолшылар үшін отбасындағы тыныштық пен қолдау – ең басты нәрсе. Аналарымыз, қыз-келіншектеріміз әрдайым тіршіліктің тірегі болып, ер азаматтарға демеу көрсетіп келеді. Сол себепті барлық әйелдер қауымын төл мерекесімен шын жүректен құттықтаймын!, -деді Ербол Сәулебеков.

Көп жылғы адал еңбегімен ерекшеленген аймақтағы вокзал кезекшілері Гаухар Қадырова, Жанерке Конусбаева, анықтама берушілер Гүлзат Палымбетова, Гүлнұр Аманқұлова, Нұргүл Абибуллаева, технолог Гүлнар Сейткамалова, бөлім басшысы Ләззат Ермұратова, инженер Дана Қойбағаровалар бөлімше директорының марапатын алса, диспетчер Ғалия Манакбаева, бөлім басшысы Зәуре Алматова, Анаргүл Қарымсақова мен Ұлжалғас Арқабаевалар облыс әкімінің алғыс хатын иеленді. Марапат иелеріне бөлімшенің кәсіподақ ұйымы дайындаған бағалы сыйлықтар да тарту етілді.

Марапат жиынында Жанболат Мейірлен мен Әбдісақи Айана теміржолшылардың балалары атынан аналарға арнап өлең оқып, бүлдіршіндердің алғысын жеткізді.

Мерекелік жиында "Қазкөліккәсіп" ҚБ филиалының төрағасы Бауыржан Ахметов те сөз сөйлеп, теміржол саласындағы әйелдердің рөлін ерекше атап өтті. Ол нәзік жандылардың жұмыс барысында жауапкершілік пен кәсібилік танытып, еңбек ұжымында татулық пен сыйластық орнатуда үлкен үлес қосып жүргеніне тоқталды.

Шара соңында облыстық мәдениет ұжымының өнерпаздары ән мен күйден шашу шашып, жиналғандарға мерекелік көңіл-күй сыйлады.

Қызметкерлер ұйымдастырушыларға алғыстарын білдіріп, ерекше әсермен тарқасты. Осылайша, Қызылорда магистральдық желі бөлімшесінде 8 Наурыз мерекесі жыл сайынғы дәстүрден өзгеше, жылы лебіз бен шынайы құрметке толы шара ретінде есте қалды.  

Сонымен қатар аяулы аналар мерекесінде аймақтағы салалық мекемелердің барлығында салтанатты шара ұйымдастырылып сала үздіктері мен озаттары марапат төріне шығарылып құрметке бөленді. Аймақтағы әр мекемеде ерлер қауымы тарапынан әзірлеген ерекше форматтағы мереке қызылордалық нәзік жанды теміржолшыларға қуаныш сыйлап, оларды шабыттандырары сөзсіз.