Маңғыстаулық нәзікжандылар марапатталды

Маңғыстаулық нәзікжандар «Үздік жүк тасымалдаушы», «Үздік байланысшы» атанды. Бұл марапатты олар халықаралық әйел-қыздар мерекесіне орай Астана қаласында ұлттық компанияның қыз-келіншектер құрметіне ұйымдастырған кездесуде ҚТЖ президентінің қолынан алды.  

Марапатталушыларды жергілікті теміржолшылар теміржол вокзалынан қарсы алып, құрмет-қошеметке бөледі. Соның бірі талай жылдан бері түбек теміржолының тасымалдау саласына еңбегі сіңген Айтгүл Демешова болса, екіншісі байланыс және белгі беру дистанциясынан Зағипа Дауқараева апамыз.

Бейнеу станциясында жүк пойызын қабылдап тапсырушы Айтгүл Нұрғалиқызы темір жолдағы еңбек жолын 2003 жыл бастапты. Ол Бейнеу станциясында қызмет етсе де күнде бірнеше шақырым жердегі Өзбекстанның аумағында тұрған Қарақалпақстан станциясына барып, сол жерде көрші жақтан келген пойыздарды қабылдап, елден шығып жатқан пойыздарды тапсыру міндетін атқарады.  Өзі Қарақалпақстанда туып, балалығы Оазис бекетінде өткендіктен қос елдің теміржолшыларын көре жүріп мамандыққа махаббаты ерте оянған екен. Теміржолшының формасына жастайынан қызықса да өсе келе анасының арманын жүзеге асыру үшін ақ халатты киюіне тура келеді.  Ананың тілін алған кем болмас деп болжаған бойжеткен мектеп бітіріп медицина бағытында білім алып, дипломымен жұмысқа орналасады. Бірақ бәрібір балалықтан аңсары ауған теміржолшы мамандығына бүйрегі бұрып, Бейнеу теміржолынан бір-ақ шығады. Содан жиырма үш жылға жуық осы салада, өзіне тапсырылған міндетті атқару үшін күнде Қазақстан-Өзбекстан арасында қатынап, жүк тасымалына қызмет етіп жүр.  

«Үздік байланысшы» атанған келесі кейіпкеріміз Зағипа Базарбайқызының да Маңғыстау теміржолына еңбегі сіңген. Маңғыстау белгі беру және байланыс дистанциясына отыз жылдан көп уақытын сарп еткен ол алғаш рет 1990 жылы Ақтөбедегі теміржол техникумында оқып жүрген кезінде тәжірибеден өтуге келеді. Көп өтпей оқуын бітірген жас маманды түбек теміржолы жұмысқа қабылдайды. Дистанцияда жас маманнан «бас маманға» айналғанша талай қиын-қыстау күндерді жеңіп, шыңдала түседі. Дистанцияның бас мекемесінде және өзі туып-өскен бұрыңғы №10, қазіргі Боздақ бекетінде электромонтер, электромеханик, диспетчер болып, бірнеше сатыдан өтеді. Бүгінде байланыс электромеханигі.

«Теміржолшыға немере, қыз, жар болдым. Теміржол бекетінде атам жолшы болса, әкем ЭЧ мекемесінде, анам теміржолдың жылыту қазандығында еңбек етті. №10 бекетте өскендіктен маған ең жақсы таныс мамандық – теміржолшы еді. Бізге онан басқа кәсіптер қызық та, соншалықты белгілі де емес еді.  Мен сияқты қос інім де теміржолға келді, олар қазір жол дистанциясында. Өмірлік серігім де жол дистанциясында жұмыс істейтін, ол кісі баламыздың алды бесте, кішісі бір жаста кезінде өмірден өтті. Содан бері сүйенерім, жұбанышым – мамандығым, жұмысым. Шүкір соның арқасында балаларымды жеткіздім, қазір немере-жиендерім бар.  

Марапат мерейді өсіреді демекші, біздің еңбегімізді елеп, бағалап  жатқанына ризамын. Бұл бізге ғана берілген марапат емес, жастардың да аянбай еңбек етуіне түрткі болатын, еңбектің еш кетпейтінін білдіретін көзқарас», - дейді Маңғыстау белгі беру және байланыс дистанциясында байланыс жүйесін қамтамасыз етіп отырған кейіпкеріміз.