Семейде «Сен сұлу» сайысы өтті
Абай облысы бойынша меншікті тілші
Семей жүк тасымалы бөлімшесінде мәдени-рухани бағыттағы іс-шаралар тұрақты түрде өткізіліп тұрады. Биылғы жылы мұндай шаралардың қатары тіптен мол болмақ. Себебі алда Жеңістің 80 жылдығы мен хакім Абайдың 180 жылдығы сынды атаулы күндер тұр.
Жуырда семейлік теміржолшылар 8 наурыз Халықаралық әйелдер мерекесі мен алдағы келе жатқан Наурыз мейрамына орайластырып ерекше байқау өткізді. Бөлімшеде қызмет ететін қыз-келіншектер арасында ұйымдастырылған «Сен сұлу» атты сын сайысы барысында қатысушылардың тек сырт сымбаты мен сәнқойлығы ғана емес, өнер-білімі де жан-жақты талқыға түсті.
Салалық кәсіподақ ұйымы ұйытқы болған іс-шараға қазылық етушілер назарынан ештеңе тыс қалмады. Қазылар алқасы әсіресе қатысушылардың ұлттық нақыштағы киім үлгілеріне, сахна мәдениетін сақтауларына да мән берді. Кәсіподақ белсенділері әзірлеген викториналық сұрақтарға жауаптары арқылы білімдері сыналса, ән мен жырға, биге кезек келгенде өнерлерін ортаға салды.
– Теміржолшылар арасында түрлі өнер иелері, қабілетті қарымды жандар жетерлік. Ең бастысы осындай іс-шаралар арқылы оларға қолдау жасау ниетіміз әріптестеріміздің арасынан зор қолдау табуда, – дейді Семей НОД-ЖТ кәсіподақ төрайымы Айгүл Берікболова.
Байқау қортындысы бойынша барлық қатысушылар құрмет грамоталарымен, кәсіподақ ұйымы атынан берілген ақшалай сыйлықтармен марапатталды.
