Абай мұражайына танымдық саяхат жасады

Шығыстағы теміржолшылар қауымы Наурыз тойын осы айдың 14-нен бастап кеткен болатын. 23-не дейін жалғасатын Наурызнама онкүндігі аясындағы іс-шаралар мейлінше мәнді өтуде.

«Мәдениет және ұлттық салт-дәстүр күні» теміржолшылар Абай мұражайына танымдық экскурсия жасап, ұлт руханиятының қайнар бұлағынан сусындап қайтты. Семей ЖТ бөлімшесі бастығының орынбасары Жанар Амангелдіқызы бастаған қыз-жігіттер бұл күні Наурыз мерекесіне орай ұлттық киім киініп, хакім мұражайына ат басын бұрудағы тағы бір себеп – биыл қазақтың бас ақынының туғанына 180 жыл толмақ. Бұл орайда теміржолшылар қауымы да мәдени-рухани іс-шараларды ұтымды түрде жүргізбек.

Төл мәдениетімізді, өнерді және ұлттық құндылықтарды насихаттауға, әсіресе жастар арасында кеңінен дәріптеуге арналған бұл күні Абайдың мемлекеттік тарихи-мәдени және әдеби-мемориалдық қорық-музейіне тағылымды саяхат ұйымдастырғандар арасында әсіресе жастардың қатары мол болды.

– Наурыз мерекесіне орай ұйымдастырылған саяхат өте әсерлі  болды, бұрын білмеген көптеген тың мағлұматтар алдық. Мәселен, күн мен түн теңелген осынау ежелгі мейрам жайында қазақ тарихында алғаш қалам тербеген хакім Абай екенін, оның бұл шығармасы елімізге наурыздың қайта оралуына себеп болғанын білгенде таңданысымызда шек болмады, – дейді теміржолшы Жастар ұйымының төрайымы Арайлым Қосанова.  

Теміржолшылар қауымы ұлы ақынның өмірі, шығармашылығы, соңына қалдырған өшпес мұрасы жайында бұрын-соңды көп айтыла бермейтін тың мәліметтерге қанықты. Сонымен қатар ақын өлеңдерін кезектесе  оқып, әлеуметтік желілерге арнайы түсірілім жасауды да ұмытпады. Мұның барлығы түптеп келгенде кеңсе қызметкерлерінің бір ауық бой жазып, рухани тұрғыдан сергуі ғана емес, ұлт құндылықтарын насихаттау екендігі анық.  

– Еліміз бойынша Наурыз мейрамын тойлаудың жаңа тұжырымдамасы бекітілгені белгілі. Оның аясында Семей теміржолында да мерекені тойлаудың өзіндік дәстүрі қалыптасып келеді. Ал биыл хакім Абайдың 180 жылдық мерейтойы осынау мерекелік күндердің мазмұнын байыта түсуде, – дейді бұл орайда пікір білдірген Семей ЖТ кәсіподақ ұйымының белсенділері.  

Десек те, қазіргі таңда күллі бөлімше бойынша алдағы 22 Наурызда өтетін Жыл басы күніне қызу даярлық жұмыстары жүргізілуде. Шығыс жұртшылығына сауын айтқан бұл мереке Семей вокзалы алаңында ерекше леппен өткізілмек. Ал оның таңғалдырар, тамсандырар бағдарламасы әзірге құпия көрінеді.