Ақтөбеге понтондық көпір паркі жеткізілді

Ақтөбе облысына көктемгі су тасқынына қатысты көмекке әскери понтондық көпір жеткізілді. Қапшағай станциясынан 8 вагонмен шыққан жүк пойызы бүгін Шұбарқұдық станциясына жетті.  

18 наурыз күні Ақтөбеге қарай Қапшағай станциясынан Қонаевтағы әскери бөлімнің понтон көпір паркі мен қызметкерлері жолға шықты. Темір жол қызметі әскери техниканы тиеу, жеткізу жұмыстарын тиянақты атқарды. Бүгін Шұбарқұдық станциясында әскери техниканы вагондардан түсіру, жүк көліктеріне тиеу жұмыстары ұйымдастырылды. Жүк көліктері Ойыл ауданына бағыт алды. Су тасқыны кезінде уақытша өткел бұзылып, Ойыл ауылының тұрғындары байланыссыз қалды. 15 наурыздан бастап ТЖД-нің құтқару қызметі ауыл халқын өзеннен қайықпен өткізіп жүр.

“Су тасқынына қарсы шараларға теміржол қызметі белсенді қатысты. Жол қатынасы үзілген ауылда понтон көпірмен тасымалдау ұйымдастырылады. Бүгін таңертең 8 вагонмен әскери техника жеткізілді. Түсіру жұмыстары ойдағыдай өтті. Техникалар Ойыл ауданына кетті”,- дейді Шұбарқұдық станциясының басшысы Алтай Абдуллин.  

Ақтөбе облысы Ойыл ауданының орталығында енді жүк пен адамдарды понтон көпір арқылы тасымалдайды. Әскери оқу-жаттығуда пайдаланылатын жылжымалы көпір көлік қозғалысы қалпына келгенше Ойыл халқын облыс орталығымен байланыстырады.  

2024 жылы су тасқыны кезінде де понтон көпірлер теміржол арқылы тасымалданды. 16 мың халқы бар ойылдықтар биыл да понтон көпірге мінеді.