Қош келдің, Әз-Наурыз!

Ұлыстың ұлы күні – Наурыз мерекесін атыраулық теміржолшылар өте ұйымшылдықпен қарсы алды. Атырау жүк тасымалы және магистральды желі бөлімшелеріне қарасты құрылымдық мекемелер кәсіподақ ұйымының қолдауымен мерекені бірге атап өтті.

Ақжайық станциясының алдындағы кең алаңға 6 киіз үй тігіліп, қала басындағы  Ақжайық, Атырау, Махамбет және Теңдік станциялары бір киіз үй, ПЧ-ЭЧ, Вагон, локомотив деполары, НОД пен НЖС әрқайсысы бір киіз үйден құрды. Соған сәйкес халық та көп жиналып, бұл нағыз бұқаралық сипаттағы тойға айналды. Шараны қос бөлімше басшылары құттықтау сөзбен ашып, жаңа жылда жаңа белестерге шығуды, наурыздан наурызға аман жетуді тіледі. 

Бір-бірін көптен көрмеген дария кеуде, тау мүсін қариялар, ұлттық киімді дәріптеп кимешек киген әже-аналар көрісіп, шұрқырасып жатыр. Орта және жас буын да олардан қалысар емес, бәрі де ұлттық киіммен жарасымды киінген. Теміржолшылардың өз күшімен даярланған мерекелік концерт те тыңдармандарға шуақты көңіл-күй сыйлады. «Ел іші - алтын кен іші» демекші әнші де, күйші, биші де теміржолшылардың өздері, өнер жұлдыздарынан бір кем емес.

 Сайдың тасындай бірінен-бірі озған ылғи өнерпаз жастар мерекеге жиналған жарты миллионға жуық қонақтың көңілін көтеріп жіберді. Ұлттық салт-дәстүрден аттамаған халық ретінде тұсау кесу рәсімі жасалды. Атырау вагон депосының вагон жөндеушісі Бегарипов Абылайдың ұлы Айтөренің тұсауын бөлімше бастығы Аслан Базарғалиев кесіп, үлкен азамат болуын тіледі. Ұлыстың ұлы күні дүйім жұрттың алдында тұсауы кесілген баланың бағы артып, жұлдызы жоғары болсын десті көпшілік. «Жаңбырмен жер, батамен ел көгерер» деп концерт соңынан сала ардагері Айтбаев Кенже ақсақал жиналғандарға арнап батасын берді.  

Дастархан басында да әр киіз үйдің ішінде сырнайлатқан әншілер, күйшілер мен бишілер өнер көрсетіп жатты. Ақжарма тілектер легі ағылып, жастарға бата берілді. Наурыз көже, құрт-май, жент, сүзбе, қымыз бен шұбат, басқа да ұлттық тағамдар қай үйде де мол болды. Ағаштан ойып жасалған және зергерлік ұлттық бұйымдар жәрмеңкесі де өтті. Далада алтыбақан тебіліп, балалар атқа мінді. Ұлттық ойындар ойналып, кір тасын көтеру, арқан тарту, асық ату ұйымдастырылды. Онда Арқан тартудан 1-ші орынды ТЧЭ-3, асық атудан машинист Ч.Жарасқан, кір тасын көтеруден Р.Аңдамасов (ПЧ-9), қол күрестен А.Асқарбақыт (ТЧЭ-3) 1 орын иеленді. Үздік киіз үйге де бәйге тігіліп, ПЧ-ЭЧ киіз үйі ұлтық нақышта өрнектелген әрі ұядай жылылығымен тартымды болды. Кәсіподақ ұйымдары мол қаражат бөліп, барлық ұжымның бірлесе бас қосуын ұйымдастыруының арқасында биылғы Наурыз мерекесі ерекше мазмұнды өтті.