Теміржолшы болам десеңіз...

Жұмысшы мамандықтары жылы аясында Ақтау ALT көлік колледжінде Маңғыстау жүк тасымалы бөлімшесінің бастығы Нәжімеден Ғұбашовпен кездесу өтті.

Еркін форматта өткен басқосу барысында білім ордасының студенттері өздерін қызықтырған сұрақтарды қысылмай қойып, болашақ мамандықтарына қатысты өздерін толғандыратын сауалдарға жауап алды. Ел экономикасында айрықша рөл атқаратын теміржол саласына жастардың қызығушылығын арттырып, мамандар дайындауда мұндай кездесулердің маңызы зор екенін атаған колледж басшылығы студенттерді бөлімше бастығының еңбек жолымен таныстырды. Уақыт бөліп жастармен кездесіп отырған теміржол басшысына алғыс айтты.  

Нәжімеден Ғұбашов өзінің ең төменгі лауазымнан басталған саладағы еңбек жолы, бүгінгі дәрежеге жетер жолдағы еңсерген кедергілер мен қиындықтар, жылдар бойғы жинаған тәжірибесі мен жетістіктері жайлы әңгімеледі. Теміржол тасымалының тиімділігі мен жұмыс сапасын арттыру жолында бөлімше ұжымы қолға алған шаралар мен өндірісті модернизациялау, жетілдірулер жайлы да сөз қозғап, студенттердің сала тынысы жайлы білімін кеңейте түсті. Теміржол инфрақұрылымын дамыту, жаңа технологияларды енгізу және жұмыс процесін оңтайландыру бағытында қолға алған бастамалары, көрсетілетін қызмет сапасын жақсарту бойынша жүргізілген жұмыстарды жастар қызығып тыңдады. Бөлімше басшысы «ҚТЖ» ұлттық компаниясындағы жас мамандарды қолдау, дамуына септік ететін жобалармен де таныстырды.  

– Қызығы мен шыжығы қатар жүретін теміржол саласында еңбек ету әркімнің маңдайына жазылмаған және екінің бірінің қолынан келе де бермейді. Теміржолшы деген абыройлы атқа табан ақы, маңдай термен талай сынақтарды еңсеріп, өз кәсібіне шын берілген жандар ғана ие болмақ. Сондықтан теміржолшы болам десеңдер мақсаттарыңнан таймай, тек алға ұмтылыңдар, – деді Нажімеден Бақтығалиұлы жастарға.