Ақтөбе облысында биыл жеті вокзал жөнделеді

Қызмет бабымен Ақтөбе облы- сына келген Көлік вице-министрі Сәтжан Аблалиев жергілікті халықпен кездесіп, салада жасалып жатқан жұмыстармен, алдағы жоспарлармен бөлісті.

Көлік министрлігі тарапынан қызмет көрсетуді жақсартып, жолаушыларға барынша қолайлы жағдай жасауға көңіл бөлініп отыр.  

«Теміржол саласын дамыту министрліктің тұрақты назарында. Былтыр жолаушылар тасымалы 7 пайызға өсті. Барлығы 20 млн жолаушы тасымалданса, оның миллионға жуығы Ақтөбе облысына тиесілі. Жолаушыларға қызмет көрсететін вокзал жағдайына келсек, елімізде көп жылдан бері жөндеу көрмей тоза бастаған вокзалдар көп. Соған байланысты министрлік үкімет қолдауымен үлкен шараны қолға алды. Республика бойынша 125 вокзалдың жөндеу жұмысын бір мезгілде бастап, бір жылда аяқтау жоспарланып отыр», – деді Сәтжан Аблалиев.  

Айтуынша, жөндеу жұмыстары алдағы аптада басталады. Оның ішінде Ақтөбе облысы бойынша 7 вокзал тізімге еніпті. Олар – Қандыағаш, Жем, Қарауылкелді, Алға және Шұбарқұдық вокзалдары.  

Вице-министр жолаушылар тасымалына байланысты вогондардың ескілігі, билеттердің тапшылығы, т.т. сауалдарға да жауап беріп, 2030 жылға дейін жолаушы вагондарын жаңартуды 80 пайызға жеткізу жоспары бар екенін жеткізді.  

«Қазір жолаушылар тасымалында екі мыңнан астам вагон болса, оның 42 пайызы ескірген, болмаса жасы 30- 40 жылдан асқан вагондар. Оны жаңарту бір күнде, бір жылда бола қоймайды, кезең-кезеңімен ауыстырылады. Елімізде вагон шығару зауыттары іске қосылып жатыр. Петропавлда вагон өндірісі жолға қойылды, Астанада неміс компаниясы құрылысын бастап жатыр», – деді вице-министр.  

Министрліктің мәліметінше, Ақтөбе – Алматы, Ақтөбе – Атырау бағытына қатынайтын жолаушы пойыздары алдағы уақытта жаңа вагондармен толықтырылады.