Жамбыл облысында бес вокзал күрделі жөндеуден өтеді
"Қазақстан теміржолшысы" газетінің Жамбыл облысындағы меншікті тілшісі
Жамбыл темір жолына қарасты вокзалдардың бесеуі биыл күрделі жөндеуден өтеді. Олар – Тараз, Шу, Түрксіб, Боранды және Отар вокзалдары.
Жақында Жамбыл облысы әкімдігі Көлік министрлігімен бірлесіп, өңірдегі күрделі жөндеуден өтетін теміржол вокзалдарының тізімін бекітті. Оған енген жоғарыдағы вокзалдар толықтай жаңартылып, ғимараттары жаңғыртылады.
– Жобаны қаржыландыру республикалық бюджет есебінен жүзеге асырылады. Бұл өңірдегі көлік инфрақұрылымын жақсартуға және теміржол нысандарында жайлы жағдай жасауға бағытталған. Соның нәтижесінде жолаушыларға көрсетілетін қызмет сапасын арттыруға мүмкіндік туады. Күрделі жөндеу жұмыстары шеңберінде вокзал аумақтары да абаттандырылады, - дейді облыс әкімінің орынбасары Қанатбек Мәдібек.
Негізі 2025 жылы Шу вокзалын күрделі жөндеуден өткізу жоспарланған болатын. Енді бекітілген тізімге сәйкес тағы төрт вокзалға жаңғырту жұмыстары жүргізіледі. Бұл – Мемлекет басшысының тапсырмасына орай Көлік министрлігі қолға алып отырған ауқымды жобалар қатарындағы шара.
Жалпы Жамбыл өңіріндегі вокзалдардың 2-еуі 1-класты, 2-еуі 3-класты, қалғаны жалпы қолданыстағылар. Былтыр вокзалдар 661 мың адамға қызмет көрсеткен. Тек Тараз вокзалы арқылы тәулігіне 24-25 жолаушылар пойызы қатынайды. Оның 4-еуі халықаралық бағытта.