Өрт ошағы туындамасын десек...
Маңғыстау облысы бойынша меншікті тілші
Маңғыстау мемлекеттік емес өртке қарсы қызметі жуырда ғана кәсіби мерекелерін атап өтті. Түбек теміржолында бұл қызметтің өз алдына дербес шаңырақ көтергеніне биыл он жыл. Сан мәрте қайта құрылымдаудан өтсе де кәсіби міндеті өзгеріссіз қалған мекеме мамандары биыл да өрт қаупін туындатар талай қатерді тұсаулап, жолын кесті.
Осы жылғы бірінші тоқсан ішінде Маңғыстау мемлекеттік емес өртке қарсы қызметкерлері жалпы саны 184 (2024 ж. – 101) нысанның өрт қауіпсіздік жағдайын тексерді. Оның барысында 158 бұзушылықты анықталып, тиісті шара қабылданды. Айта кетерлігі, тексеріс саны көбейген сайын ондағы анықталған деректер де арта түскен.
Ал енді биылғы өрт қауіпсіздігі ережелерін бұзу фактілеріне тоқталсақ, олар өрт сөндіргіштер бойынша, автоматты өрт сөндіру құрылғысының жарамсыздығы немесе жабдықталмағандығы, автоматты өрт дабыл қаққыштың жарамсыздығы немесе жабдықталмағандығы, жылыту пештерінің ӨҚ ережесіне сәйкес еместігі, сондай-ақ тоқ жүйесіндегі, бұзушылық апаттық шығу жолдарындағы кемшіліктер. Бұдан басқа да өртке қауіпті бірнеше пункт бойынша бірқатар дерек тіркелген. Олар – жылыту жүйесі мен сумен өрт сөндіру жүйесінің жарамсыздығы, автоматты өрт дабылқаққыш жүйесіне техникалық қызмет көрсетілмеу, жылыту пункттерінің ішкі жағы жанғыш материалмен қапталуы, өртке қарсы режимнің сақталмауы және басқа да олқылықтар.
– Кейде елеусіз ғана бір кемшілік болуы мүмкін. Бірақ мәселе өрт қауіпсіздігі туралы болғандықтан оны үлкен-кіші деп қарауға болмайды. Байқалмайтын бір олқылықтан үлкен өрт шығып кетпесіне ешкім кепілдік бере алмайды. Өрт – тілсіз жау, одан тек сақтансаң сақтайды. Осы мақсатта біз тексерістер барысында әрбір детальді мұқият қарап, ешнәрсені қалт жібермеуге тырысамыз. Анықталған кемшіліктер бойынша қажетті шаралар қолданамыз. Мәселен осы тоқсанда сондай жайттарға қатысты 10 ескерту парағын бердік. Соның ішінде нысанға 7, тоқтан ажырату бойынша 1, қызметтік-техникалық вагонға 2 ескерту парағы берілді. Сонымен қатар тағы бір айта кететін нәрсе, былтырғы бұл мерзімде бірде бір жолаушылар пойызы тексерілмеген еді. Биыл жалпы 2/3 (жолаушылар пойыздары/вагондарын қарап, 1 бұзушылықты таптық. 3 (2024 ж. – 0) локомотивтен 4 бұзушылық анықтадық. 36 арнайы жылжымалы құрамнан тек 1 кемшілікті кездестірдік. 7 (2024 ж. – 0) қызметтік-техникалық вагонда 8 (2024 ж. – 0) бұзушылықты тіркедік. Мәселе тек кемшін тұстарды тауып, шара қолданумен ғана бітпейді. Бұл үшін теміржол қызметкерлерінің тиісті біліктілігі болуы өте маңызды. Сондықтан 189 жұмыскерге өрт қауіпсіздік нұсқауы өткізілді. 2024 жылғы есептік мерзімде небәрі 120 адамды қамтыған едік. Сондай-ақ 4 рет оқу-жаттығу да өткіздік. Осындай жұмыстардың жемісі десек болар, аталған мерзім ішінде бірде бір өрт оқиғасы тіркелген жоқ. Өрт ошағы туындамасын десек, оның алдын алу, сақтандыру нұсқамаларын бұлжытпай орындап, ұдайы профилактикалық жұмыстар жүргізген жөн, – дейді «ҚТЖ» ҰК» АҚ Мемлекеттік емес өртке қарсы қызметінің бастығы Қайырхан Таласов.
Орайы келгенде айтып өтсек, 2022 жылдан бастап Маңғыстау мемлекеттік емес өртке қарсы қызметі Маңғыстау магистральдық желі бөлімшесінің құрамынан шығып, Көпсалалы қызмет көрсету орталығы филиалының қосымша штатына өтті. Қазіргі негізгі міндеті өрттің алдын алу жұмыстарын жүргізу, нысандар, жылжымалы құрамалардың өрт қауіпсіздік жағдайын тексеру. Ал мекеменің еншісінде болған Өрт сөндіру пойыздары бұрынғыша Магистральдық желі бөлімшесінің құрамында қалды.