Маңғыстау темір жолында көктемгі сынақ жүріп жатыр
Маңғыстау облысы бойынша меншікті тілші
Түбек теміржолында көктемгі комиссиялық байқау басталды. Маңғыстау жүк тасымалы бөлімшесінің директоры Нәжімеден Ғұбашовтың жетекшілігімен құрылған комиссиялық топтың құрамында алпыстан астам адам бар.
Маңғыстау станциясынан 15 сәуір күні Болашақ станциясына арнайы пойызбен жолға шыққан комиссия құрамында Жүк тасымалы және Магистральдық желі бөлімшесінің басшылары, аймақтық бас ревизор мен түрлі шаруашылық бойынша ревизорлар, кәсіподақ ұйымы төрағалары мен бөлімшелерге қарасты деполар мен дистанциялардың басшылары, персоналды басқару бөлімінің мамандары мен жетекші инженерлер 16 сәуірде белгіленген кесте бойынша жұмысты бастады. Болашақ станциясындағы теміржол мекемелерін тексеріп, станциядағы жүк алаңдарын, жол шаруашылығы, электрмен жабдықтау, өрт сөндіру, т.т. салалардағы жазғы тасымалға дайындық жұмыстарын мұқият қарап шыққан комиссия әрі қарай Жаңаөзен станциясына бет бұрды. Одан әрі Құрық порты станциясына дейінгі аралықтағы теміржол құрылымдарын демалыс күніне дейін аралап, мақсатты міндеттерін жүзеге асырған комиссия осы аптаның басында Маңғыстаудан Құлсары бағытына қарай ойысып, 24 сәуірге дейін Құлсары – Бейнеу, Бейнеу – Тассай, Бейнеу – Оазис телімдеріндегі теміржол нысандарында болып, дайындықтарын қарады.
– Көктемгі комиссиялық байқау мамыр айының басында аяқталады. Содан соң кездескен кемшіліктер мен жұмыстарды талқылау үшін кеңейтілген тораптық жиын өткізіліп, қорытындысы шығарылады. Түйінді мәселелерді шешу жолдары қарастырылады, – дейді Маңғыстау жүк тасымалы бөлімшесінің өндірістік бөлім басшысы Нұркен Қосымов.