Түлектерді жұмысқа шақырды
"Қазақстан теміржолшысы" газетінің Жамбыл облысындағы меншікті тілшісі
Жамбыл магистральдық желі бөлімшесінің қызметкерлері Тараз көлік және коммуникация колледжінің бітіруші түлектерімен кездесу өткізді.
Іс-шарада «Теміржол – тұрақты болашақтың кепілі. Арманыңды осы жолмен жүзеге асыр!» тақырыбында әңгіме қозғалып, студенттерге көлік-логистикалық кешеннің жұмысы мен артықшылықтары, үнемі даму үстінде болатын саладағы еңбек нарығында жұмысшы мамандықтарға деген сұраныс төмендемейтіні түсіндірілді.
Кадр мамандары қазіргі уақытта Жамбыл магистральдық желі бөлімшесіне қарасты еңбек ұжымдарында қандай мамандар қажет екенін айтып, еңбек нарығындағы сұранысқа талдау жасады. Түлектерді оқуды бітірген соң тұрақты табыстың кепілі болатын теміржол саласында жұмыс істеуге шақырды.
Былтыр оқу орнын 208 түлек бітірсе, биыл 205 студент дипломды маман атанбақ. Саланың дамуына қарай, жыл өткен сайын мамандықтар түрі де қосылуда. Айталық, 2025 жылы оқу орнынан жастар «Теміржолдың жылжымалы тартқыш құрамын пайдалану, жөндеу және техникалық қызмет көрсету», «Автоматика, телемеханика және теміржол көлігіндегі қозғалысты басқару», «Дәнекерлеу ісі», «Токарлық іс», «Төтенше жағдайда қорғау» және тағы басқа мамандықтар бойынша білім алып, кәсіп игеріп шығады.
