Қызылорда теміржолының шежірелі жолы мен жаңа жетістіктері

Қызылорда станциясындағы бөлімшенің мәжіліс залында өткен салтанатты жиын аймақтағы теміржолшылардың кәсіби мерекесіне арналды. Мерекелік рәсім жергілікті өнерпаздардың ән шашуымен ашылып, жыл сайынғы дәстүрге айналған қуаныш биыл ерекше мазмұнға ие болды. Себебі биыл Қазалы жол дистанциясының, Қызылорда теміржол вокзалының және Қызылорда жол дистанциясының 120 жылдық мерейтойы кәсіби мейраммен қатар тойлануда.

Салтанатты шараға Қызылорда ЖТ бөлімшесінің директоры Батырхан Базарбаев, Қызылорда магистральдық желі бөлімшесінің директоры Ербол Сәулебеков, сондай-ақ «Қазкөліккәсіп» ҚБ Қызылорда филиалының төрағасы Бауыржан Ахметовтер аймақ теміржолшыларының жетістіктеріне тоқталып, әріптестерін кәсіби мерекемен шын жүректен құттықтады.

Аймақтағы 4 бірдей теміржолшының «Құрметті теміржолшы» атағын алуы сырбойылық теміржолшылардың абыройын асқақтатқан айтулы жаңалық болды. Марапат иелері қатарында Қызылорда магистральдық желі бөлімшесінің директоры Ербол Сәулебеков, Сексеуіл локомотив пайдалану депосының машинисі Оңғар Аманқұлов, Қазалы вагон пайдалану депосының вагон қараушы-жөндеушісі Алпысбай Жиенұлов және Қызылорда ЖТ бөлімшесі кәсіподақ ұйымының төрағасы Мұхтар Көпірбаев бар.

Мерекелік кештің бір көрнекті сәті Қызылорда локомотив пайдалану депосының машинисі, ТМД бойынша кәсіпқой чемпионат жеңімпазы Жасұлан Смағұлдың «Үздік машинист» белгісімен марапатталуы болды. Оның ата-анасына компания басшылығы атынан арнайы алғыс хат табысталып, бұл сәт теміржолшылар арасында ерекше тебіреніс туғызды.

Сонымен қатар, ТЧЭ-36 локомотив бригадаларын оқыту нұсқаушысы Нұрлан Жұмқанов пен Қыдырбай Бекбаев «Адал еңбегі үшін» белгісіне ие болды. Конту станциясының бастығы Әділхан Насанов «Кәсібі бойынша үздік» атанса, ТЧЭ-34 тепловоз машинисі Азамат Хайдаров «Жас үздік маман» белгісімен марапатталды.

Аймақ бойынша 50-ге жуық теміржолшы ҚТЖ ҰК» АҚ, ҚТЖ-ЖТ» ЖШС, Қызылорда облысы әкімдігі, «Аманат» партиясы және кәсіподақ ұйымдары атынан марапаттарға ие болды. Әсіресе, С. Рахметовтың атынан табысталған ата-аналарға арналған алғыс хаттар теміржолшылардың еңбегіне көрсетілген ерекше құрметтің белгісіне айналды.

Салтанатты жиында Қызылорда ЖТ бөлімшесінің директоры Батырхан Базарбаев «Аймақ теміржолшылары бұл мерекеге зор табыспен келіп отыр. Биыл аймақ бойынша 4 теміржолшының құрметті атақ алуы сырбой теміржолшыларының мерейі. Компания басшылығы атынан Жасұланның ата-анасын арнайы келіп құттықтау жасалды. Әріптесіміз Жасұланның бүкіл ТМД бойынша жеңімпаз болуы да біздің абыройымызды асқақтатты. Мереке құтты болып марапат иелерін шын жүректен құттықтаймын. Еңбекті бағалау үлкен мотивация. Марапаттау легі мұнымен тоқтамайды»,-деп атап өтті.

Теміржол саласында абыройлы еңбек етіп жүрген қызылордалықтар үшін бұл кәсіби мереке — ерекше шабыт пен жаңа белестерге жетелейтін қуатты серпін болды.