Жаздың әр күні тиімді

Атырау облысында жолды күрделі жөндеу жұмыстары әлі де жалғасып жатыр. Бүгінгі таңда жоспарлы жұмыстың жартысынан көбі, 70 пайызға жуығы орындалды деуге болады.

Атырау магистральдық желі бөлімшесінің директоры Аралбай Қосымбаевтың айтуынша, биылғы жылы өңірде 66,7 шақырым жолды күрделі жөндеу жоспарланған. Соның ішінде Атырау жол дистанциясына берілген күрделі жөндеу жоспары 40,5 шақырым, Құлсары жол дистанциясы бойынша 26,321 шақырым. Соған сәйкес қазіргі таңда ол жұмыстардың 41,1 шақырымы жүргізілді, яғни жартысынан көбі аяқталды.  

Бүгінде қызу жұмыс Атырау жол дистанциясы бойынша Ганюшкино-рзд.4, рзд5, рзд.265-рзд.279 шақырымдарда, Құлсары жол дистанциясы бойынша рзд.465-Майкөмген-рзд.467-468 аралығында 6 сағаттық «толаскез» алынып, Ганюшкино-Атырау, Құлсары-Бейнеу учаскелерінде жүріп жатыр.  

Бөлімше бойынша қазіргі уақытта күшейтілген орташа жөндеу жұмыстары да қатар атқарылып жатыр: 8,119 шақырымды, темірбетонды бағыттамалы бұрмаларды ауыстыру 31 жиынтықты, түйіспесіз рельс ауыстыру 10 шақырымды құрап отыр. Биыл 8 шақырым жолда ескі Р-50 рельстерін жаңа Р-65-ке ауыстыру көзделіп, қазіргі уақытта Құлсары станциясы, рзд-Қоркөл-461-463-464 бекеттерінде оның басым бөлігі орындалған.  

Сонымен қатар ағымдағы жылы Құлсары станциясында 10 жиынтық темірбетон бағыттамалы бұрмаларды ауыстыру жұмыстары да жүргізіліп және ескі бұрмаларды жаңа Р-65-ке ауыстыру бойынша 5 жиынтық ауыстырылған. Станция жолдары мен бағыттамалы бұрмалардың жағдайын жақсарту және нығайту бойынша 21,85 шақырым жұмыс жасалды.  

Елді мекендер маңы, қозғалысы жиі учаскелер мал өтпейтін шарбақтармен қоршалғанына қарамастан, теміржол бойында малдың жүруі жиі кездесетін құбылыс. Ал ол өз кезегінде пойыздардың қауіпсіздігіне нұқсан келтіреді. Өңірде биылға барлығы 115,4 шақырым қоршау салу керек болса, бүгінде оның 32,9 шақырымы орындалған. Соның ішінде Майкөмген станциясы, рзд-Сарға, рзд-461-467 арлығында 20 шақырым көлемінде қоршау салынып жатыр. Жолшылар жаздың әр күнін тиімді пайдалануға тырысып бағуда.