Вокзалда туристерге QR-код таратылды
Ақтөбе облысы бойынша меншікті тілші
Әр туристің қауіпсіздігі маңызды. Тәртіп сақшылары шетелдік меймандарға туристік карта берді. Онда қауіп төнген жағдайда полицияға шұғыл хабарласу жолы көрсетілген.
Арнайы карталар теміржол вокзалында шетелдік жолаушыларға таратылып жатыр. Бұл бастама шетел азаматтарының қауіпсіздігін қамтамасыз етіп қана қоймай, еліміздің туристік инфрақұрылымын жетілдіруге мүмкіндік береді. Сонымен қатар картада жедел көмек қызметімен байланыс орнатуға арналған «102» мобильді қосымшасын жүктеу нұсқаулығы қарастырылған.
“Карталар елге кірген шетел азаматтарына халықаралық әуежайларда, теміржол вокзалдарында таратылып жатыр. QR-код арқылы бірнеше тілде ақпарат берілген safetravel.kz сайтына сілтеме жасайды. Онда шұғыл қызметтердің байланыс нөмірлері полиция, жедел жәрдем, құтқару қызметінің нөмірі көрсетілген. Бұл ел аумағында туристердің өздерін қауіпсіз сезіну үшін маңызды”,- деді Ақтөбе станциясындағы желілік полиция бөлімінің баспасөз қызметі.
Сонымен қатар QR-код картасында көші-қон тіркеу ережелері, кең таралған такси сервистері, ұялы байланыс операторларының тізімі және жеке қауіпсіздік бойынша ұсынымдар бар.
Ақтөбе станциясынан өтетін туристер легі көбінесе Ресей Федерациясы мен ТМД елдерінен екені айтылды. Мәселен, осы жылдың бірінші жартыжылдығында ақтөбелік көлік полицейлері теміржол және әуе көлігін пайдаланған 586 мың 806-ға жуық жолаушының қауіпсіздігін қамтамасыз еткені белгілі болды.